İmişli rayon Dəyanət Ələkbərov adına Əliyetməzli kənd tam orta məktəb

TƏBRİK EDİRİK! 🎉

Məktəbimizin texnologiya müəllimi Qəhrəmanova Süsən Kərim qızı müəllimlərin sertifikatlaşdırılması prosesi çərçivəsində keçirilmiş imtahanda 50 bal toplayaraq uğurlu nəticə əldə etmişdir.

Bu nailiyyət müəllimimizin peşəkar hazırlığının, öz üzərində davamlı çalışmasının göstəricisidir. Əldə olunan yüksək nəticə təhsilin keyfiyyətinin yüksəldilməsi istiqamətində görülən işlərin mühüm göstəricilərindən biridir.

Məktəbimizin direktoru Şaiq Məmmədov və kollektivimizin adından Süsən müəllimi səmimi qəlbdən təbrik edir, ona gələcək pedaqoji fəaliyyətində yeni uğurlar, möhkəm cansağlığı və davamlı nailiyyətlər arzulayırıq.

Uğurunuz mübarək, nailiyyətləriniz davamlı olsun!

TƏBRİK EDİRİK! 🎉

Məktəbimizin tarix müəllimi Kazımlı Zümrüd müəllimlərin sertifikatlaşdırılması prosesi çərçivəsində keçirilmiş imtahanda 53 bal toplayaraq yüksək nəticə əldə etmişdir.

Bu uğur Zümrüd müəllimin peşəkarlığının, zəngin bilik və təcrübəsinin, eləcə də təhsilin keyfiyyətinin yüksəldilməsi istiqamətində göstərdiyi məqsədyönlü fəaliyyətin bariz nümunəsidir.

Məktəbimizin direktoru Şaiq Məmmədov və məktəb kollektivi adından Zümrüd müəllimi səmimi qəlbdən təbrik edir, ona gələcək pedaqoji fəaliyyətində yeni nailiyyətlər, möhkəm cansağlığı və daha böyük uğurlar arzulayırıq.

Uğurlarınız davamlı, yolunuz daim açıq olsun!

Tədris ilinin yekunlarına həsr olunmuş valideyn iclaslarına start verilmişdir.

✅✅✅

İlk olaraq VIII və IX sinif şagirdlərinin valideynləri ilə görüş keçirilmişdir. İclas zamanı şagirdlərin tədris göstəriciləri və il ərzində əldə etdikləri təlim nəticələri təhlil edilmiş, növbəti tədris ili üzrə qarşıda duran hədəflər və hazırlıq istiqamətləri barədə valideynlərə ətraflı məlumat verilmişdir.

Eyni zamanda yay tətilinin səmərəli təşkili, şagirdlərin mütaliəyə, idmana və inkişafyönümlü fəaliyyətlərə cəlb olunmasının əhəmiyyəti diqqətə çatdırılmışdır.

Görüşdə şagirdlərin sağlamlığının və təhlükəsizliyinin qorunması, internetdən təhlükəsiz istifadə, zərərli vərdişlərdən uzaq olmaları və valideyn nəzarətinin gücləndirilməsi ilə bağlı tövsiyələr verilmişdir.

Sonda valideynləri maraqlandıran suallar cavablandırılmış, məktəb-valideyn əməkdaşlığının təhsilin keyfiyyətinin yüksəldilməsi və şagirdlərin hərtərəfli inkişafında həlledici rol oynadığı vurğulanmışdır.

Məktəbimizdə 2025–2026-cı tədris ilinin başa çatması münasibətilə “Son Zəng” tədbiri keçirildi.

🇦🇿🇦🇿🇦🇿

Tədbir Azərbaycan Respublikasının Dövlət Himninin səsləndirilməsi və müstəqilliyimiz, ərazi bütövlüyümüz uğrunda canlarından keçmiş qəhrəman şəhidlərimizin əziz xatirəsinin bir dəqiqəlik sükutla yad edilməsi ilə başladı.

Daha sonra məktəbin direktoru Şaiq Məmmədov çıxış edərək məzunları təbrik etdi, onlara gələcək həyat yollarında uğurlar arzuladı, bilik, vətənpərvərlik və mənəvi dəyərlərə sadiq qalmağın vacibliyini vurğuladı.

Tədbirdə fəxri qonaq qismində iştirak edən Vətən müharibəsi iştirakçısı, qazi Həşimov Qismət Razim oğlu çıxış edərək şagirdlərə gələcək həyatlarında uğurlar arzuladı, Vətənə layiqli vətəndaş olmağın önəmindən danışdı.

Daha sonra ibtidai sinif müəllimi Rəhimova Mailə, sinif rəhbəri Kazımlı Zümrüd və valideynlər çıxış edərək məzunlara ən xoş arzularını çatdırdılar, onlara gələcək həyatlarında uğurlar dilədilər.

XI sinif şagirdi Qəhrəmanova Aytəkin Yasəf qızı çıxış edərək müəllimlərə, valideynlərə və məktəb kollektivinə göstərilən qayğı və dəstəyə görə təşəkkürünü bildirdi.

Tədbir I sinif şagirdlərinin təqdim etdikləri ədəbi-bədii kompozisiyalarla davam etdi. Sonra ənənəyə uyğun olaraq XI sinif üzrə sinif nümayəndəsi Qəhrəmanova Aytəkin ötən il məzunlardan təhvil aldığı müqəddəs üçrəngli Azərbaycan bayrağını X sinif üzrə sinif nümayəndəsi Qəhrəmanova Qönçəyə təqdim etdi.

Tədbir “Son Zəng”in səsləndirilməsi ilə yekunlaşdı.

Məzunlarımızı ürəkdən təbrik edir, onlara gələcək həyatlarında uğurlar, yeni nailiyyətlər və işıqlı bir gələcək arzulayırıq! 🇦🇿🎓🌹

Tədris ilinin yekunlarına əsasən fərqlənən şagirdlər rəğbətləndirildi.

✅✅✅

2025–2026-cı tədris ilinin yekunlarına əsasən təhsildə, məktəbdaxili tədbirlərdə, ictimai fəaliyyətlərdə və nümunəvi davranışları ilə fərqlənən şagirdlər məktəb rəhbərliyi tərəfindən fəxri fərmanlarla təltif olunublar.

Təltifetmə mərasimində çıxış edən məktəb rəhbərliyi şagirdləri əldə etdikləri uğurlar münasibətilə təbrik edərək, onlara gələcək təhsil həyatlarında yeni nailiyyətlər arzulayıb. Bildirilib ki, əldə olunan hər bir uğur zəhmətin, məsuliyyətin və məqsədyönlü fəaliyyətin nəticəsidir.

Fəxri fərmanla təltif olunan bütün şagirdlərimizi təbrik edir, onlara gələcək fəaliyyətlərində yeni uğurlar arzulayırıq.

Tədris ilinin yekunlarına həsr olunmuş 8-ci Pedaqoji Şura iclası keçirilib.

✅✅✅

12 iyun 2026-cı il tarixində məktəbimizdə 2025–2026-cı tədris ilinin yekunlarına həsr olunmuş 8-ci Pedaqoji Şura iclası keçirilmişdir.

İclasda gündəlikdə duran məsələlər müzakirə olunmuş, tədris ilinin nəticələri təhlil edilmiş və müvafiq qərarlar qəbul edilmişdir.

Pedaqoji Şurada IX və XI sinif şagirdlərinin Dövlət İmtahan Mərkəzi tərəfindən keçirilmiş yekun attestasiya nəticələri ətraflı təhlil olunmuşdur. Qeyd edilmişdir ki, IX sinif üzrə orta nəticə 105,3 bal, XI sinif üzrə isə 103 bal təşkil etmişdir. Nəticələrin məktəbdaxili qiymətləndirmə göstəriciləri ilə müqayisəli təhlili aparılmış, növbəti tədris ilində təlim keyfiyyətinin daha da yüksəldilməsi istiqamətində qarşıda duran vəzifələr müəyyən edilmişdir.

İclasda həmçinin 2026–2027-ci tədris ili üçün müəllimlər arasında təxmini dərs bölgüsü, yay tapşırıqları almış şagirdlərlə işin təşkili, tədris ilinin yekunlarına dair hesabat, eləcə də təhsilverənlərin etik davranış qaydalarına əməl olunması məsələləri müzakirə edilmişdir.

Çıxış edənlər təlim-tərbiyə prosesinin keyfiyyətinin artırılması, şagird nailiyyətlərinin yüksəldilməsi, sağlam mənəvi-psixoloji mühitin qorunması və pedaqoji etika prinsiplərinə ciddi əməl olunmasının vacibliyini vurğulamışlar.

İclasın sonunda gündəlikdə duran bütün məsələlər üzrə müvafiq qərarlar qəbul edilmiş, qarşıdakı dövr üçün fəaliyyət istiqamətləri müəyyənləşdirilmişdir.

Məktəb kollektivi qarşıya qoyulan vəzifələrin uğurla icrası istiqamətində fəaliyyətini davam etdirəcəkdir.

İmişli rayonu D. Ələkbərov adına Əliyetməzli kənd tam orta məktəbində Azərbaycan Respublikasının İnsan Hüquqları üzrə Müvəkkilinin (Ombudsman) təşəbbüsü ilə elan olunmuş “İnsan Hüquqları Aylığı” çərçivəsində maarifləndirici tədbir keçirilmişdir.

Tədbirdə məktəbin tarix müəllimi Kazımlı Zümrüd çıxış edərək insan hüquq və azadlıqlarının qorunmasının əhəmiyyəti, hüquqi dövlət quruculuğunda vətəndaş məsuliyyəti, insan hüquqlarına hörmət və hüquqi maarifləndirmənin cəmiyyətin inkişafındakı rolu barədə iştirakçılara geniş məlumat vermişlər.

Çıxışlarda xüsusilə gənc nəslin hüquqi biliklərinin artırılmasının, onların hüquq və vəzifələri barədə məlumatlandırılmasının vacibliyi vurğulanmış, mövzu ətrafında fikir mübadiləsi aparılmışdır.Tədbir iştirakçılarını maraqlandıran suallar cavablandırılmışdır.

Qeyd olunmuşdur ki, insan hüquq və azadlıqlarının təbliği, hüquqi şüurun formalaşdırılması və vətəndaş məsuliyyətinin gücləndirilməsi istiqamətində həyata keçirilən maarifləndirici tədbirlər xüsusi əhəmiyyət daşıyır.

:::

İmişli rayonu D. Ələkbərov adına Əliyetməzli kənd tam orta məktəbində Böyük Summativ Qiymətləndirmələrin (BSQ) təşkili və keçirilməsi prosesi davam edir.

Azərbaycan Respublikası Elm və Təhsil Nazirliyinin məktəbdaxili qiymətləndirmə qaydalarına, eləcə də məktəb direktorunun müvafiq əmrinə əsasən BSQ-lərin şəffaf, obyektiv və etibarlı şəkildə keçirilməsi təmin edilir. Qiymətləndirmə prosesinin təşkili, imtahan materiallarının hazırlanması, nəticələrin obyektiv yoxlanılması və ümumi nəzarət məktəbin Daxili Keyfiyyətin Təminatı və Özünüqiymətləndirmə Komissiyası tərəfindən həyata keçirilir.

Qiymətləndirmə günlərində imtahan otaqlarında nizam-intizamın qorunması, şagirdlərin davranış qaydalarına əməl etməsi və prosesin şəffaf şəkildə təşkili məqsədilə nəzarətçi müəllimlər fəaliyyət göstərirlər. Şagirdlər üçün bərabər və əlverişli qiymətləndirmə mühitinin yaradılması əsas prioritetlərdən biri kimi diqqətdə saxlanılır.

Qeyd edək ki, BSQ-lər təhsilalanların təlim nəticələrinin ölçülməsi, əldə olunmuş bilik və bacarıqların qiymətləndirilməsi, eləcə də tədris prosesinin keyfiyyətinin müəyyənləşdirilməsi baxımından mühüm əhəmiyyət kəsb edir.

Məktəb rəhbərliyi tərəfindən qiymətləndirmə prosesinə davamlı nəzarət edilir və bütün mərhələlərin normativ sənədlərin tələblərinə uyğun həyata keçirilməsi təmin olunur.

Məktəblilərarası Milli Kosmik Poçt Kart Müsabiqəsinin məktəb mərhələsi keçirildi.

🌏🌎🌍

İmişli rayon Dəyanət Ələkbərov adına Əliyetməzli kənd tam orta məktəbində Azərbaycan Respublikasının Kosmik Agentliyi (Azərkosmos) tərəfindən təşkil olunan Məktəblilərarası Milli Kosmik Poçt Kart Müsabiqəsinin məktəb mərhələsi uğurla keçirildi.

Müsabiqənin keçirilməsində məqsəd şagirdlərdə kosmos, elm və innovasiyalara marağın artırılması, onların yaradıcılıq və təxəyyül imkanlarının inkişaf etdirilməsi olmuşdur.

Tədbir çərçivəsində şagirdlər kosmos, gələcəyin texnologiyaları, Yer planetinin qorunması və bəşəriyyətin gələcəyi ilə bağlı düşüncə və arzularını poçt kartlarında əks etdirmişlər. Təqdim olunan işlər yaradıcılıq, orijinallıq və mövzuya uyğunluq meyarları əsasında qiymətləndirilmiş, seçilən işlər növbəti mərhələyə təqdim olunmaq üçün müəyyən edilmişdir.

Müsabiqə şagirdlərin yaradıcılıq bacarıqlarının, elmi dünyagörüşünün və gələcəyə baxışlarının formalaşdırılmasında mühüm rol oynamışdır.

Bu günün xəyalları sabahın kəşflərinə çevrilir!

1 İyun – Uşaqların Beynəlxalq Müdafiəsi Günü münasibətilə məktəbəhazırlıq qrupunun balaca fidanları təbrik edilmiş, onlara xoş arzular çatdırılmışdır.

✅✅✅

Qeyd edilmişdir ki, məktəbəhazırlıq qruplarında təlim prosesi oktyabr ayının 1-də başlamış və may ayının sonunda uğurla başa çatmışdır. Bu müddət ərzində məktəbəhazırlıq qrupunun şagirdləri məktəb mühitinə uyğunlaşmış, ilkin bilik və bacarıqlara yiyələnmiş, yeni dostluqlar qazanaraq gələcək təhsil həyatlarına mühüm addım atmışlar.

Sabahın şagirdləri olan bu balaca fidanlara növbəti tədris ilində, I sinifdə uğurlar, yeni nailiyyətlər və parlaq gələcək arzulayırıq. İnanırıq ki, onların bu gün atdıqları kiçik addımlar gələcəkdə böyük uğurların təməlini təşkil edəcəkdir.

Əziz balalar, bayramınız mübarək! Üzünüzdən təbəssüm, qəlbinizdən sevinc əskik olmasın!