60 Nömrəli Tam Orta Məktəb

18/06/2026

Yeni təmayül tədris modelinə qeydiyyat başlayıb

Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən tam orta ümumtəhsil müəssisələrində X-XI siniflər üçün nəzərdə tutulan yeni təmayül tədris modelinə şagird və müəllimlərin qeydiyyatı başlayıb.

Modelin əsas məqsədi şagirdlərin əlavə hazırlıq kurslarına ehtiyac duymadan məktəbdə təşkil olunan gücləndirilmiş tədris prosesi vasitəsilə ali təhsil müəssisələrinə qəbul üçün zəruri bilik və bacarıqlara yiyələnməsini təmin etməkdir.

Qeydiyyat prosesində BŞTİ-nin tabeliyində fəaliyyət göstərən tam orta ümumtəhsil müəssisələrinin X və XI sinif şagirdləri iştirak edə bilərlər.

Tədris prosesinin keyfiyyətinin yüksəldilməsi məqsədilə qabaqcıl pedaqoji təcrübəyə malik müəllimlər də yeni təmayül tədris modelinə cəlb olunacaqlar. Seçim zamanı peşəkarlıq, pedaqoji fəaliyyət göstəriciləri və tədrisin keyfiyyətinə təsir edən digər meyarlar nəzərə alınacaq.

Yeni təmayül tədris modelində iştirak etmək istəyən şagird və müəllimlər elektron sistem vasitəsilə müraciət edə bilərlər.

Şagirdlər üçün qeydiyyat:
https://docs.google.com/forms/d/e/1FAIpQLSfH-gbLr4r0Hf5p2IRbbbZqURFZUcSA6A72Gz1qytwUT9_xcQ/viewform?usp=publish-editor

Müəllimlər üçün qeydiyyat:
https://docs.google.com/forms/d/e/1FAIpQLScbzg-UGJSydggPrLl4Eo1shd-FeVCrkLVrWaY9zA8ZIGuiFw/viewform?usp=header

13/06/2026

“Son zəng” – məktəb illərinə duyğulu vida

Bu gün P. Nəzərov adına 60 nömrəli tam orta ümumtəhsil məktəbində məzunlarımız üçün yaddaqalan və qürurverici “Son zəng” tədbiri keçirildi.

Tədbiri giriş sözü ilə açan məktəbin direktor əvəzi Xədicə Əliyeva qonaqları, valideynləri, müəllimləri və şagirdləri salamladı. O, məktəbin cari tədris ilində əldə etdiyi nailiyyətlərdən, şagirdlərin müxtəlif müsabiqə və olimpiadalarda qazandıqları uğurlardan, təhsil göstəricilərindən bəhs edərək məzunları təbrik etdi və onlara gələcək həyat yollarında uğurlar arzuladı. Daha sonra tədbirdə iştirak edən dəyərli qonaqlara söz verildi.

Tədbirdə məktəbimizin dəyərli qonaqları – millət vəkili Göydəniz Qəhrəmanov, eləcə də şəhid məzunumuz Rəşad Zeynalovun valideynləri iştirak edirdilər.

Tədbir məzunların səhnəyə dəvət olunması ilə davam etdi. Azərbaycan Respublikasının Dövlət Himni səsləndirildi, üçrəngli bayrağımız meydana gətirildi və Vətənimizin azadlığı uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edildi.

Daha sonra təhsil və ictimai fəaliyyətlərdə fərqlənən şagirdlərə diplomlar təqdim olundu, məzunların uğurları qeyd edildi.

Çıxış edən Göydəniz Qəhrəmanov məzunları təbrik edərək onların gələcəyin savadlı və layiqli vətəndaşları olacaqlarına inandığını bildirdi.

Şəhid məzunumuz Rəşad Zeynalovun valideynləri də çıxış edərək məktəb kollektivinə minnətdarlıqlarını ifadə etdilər. Onlar qeyd etdilər ki, bu gün onlar üçün xüsusi məna daşıyır. Çünki şəhidimizin bacısı Fatimə Zeynalı da bu il məktəbimizi bitirərək məzun olur. Bu kövrək və qürurverici məqam tədbir iştirakçılarını duyğulandırdı.

Məktəbin ənənəsinə uyğun olaraq simvolik açar 11-ci sinif şagirdləri tərəfindən 10-cu sinif şagirdlərinə təqdim edildi. Bu mərasim məktəb dəyərlərinin və ənənələrinin gələcək nəslə ötürülməsinin rəmzi oldu.

Tədbirin bədii hissəsində şagirdlər tərəfindən rəqs nömrələri və musiqi kompozisiyaları təqdim edildi, mahnılar səsləndirildi və məzunlarla bağlı duyğulu anlar yaşandı.

Sonda birinci sinif şagirdləri ilə birlikdə 11-ci sinif məzunları son zəngi səsləndirdilər. Son zəngin sədaları altında məktəb illərinə vida edən məzunlarımız yeni həyat mərhələsinə qədəm qoydular.

Məzunlarımıza gələcək həyatlarında uğurlar, yeni nailiyyətlər və parlaq gələcək arzulayırıq! 🔔📚🇦🇿🌹

11/06/2026

Qürurverici uğur!

Məktəbimizin 8-ci sinif şagirdi Əminə Mirzəyeva biologiya fənni üzrə keçirilən Respublika Fənn Olimpiadasında yüksək nəticə göstərərək II yerə layiq görülmüşdür.

Eminənin qazandığı bu uğur onun biliyinin, zəhmətinin və elmə olan marağının parlaq göstəricisidir. Bu nailiyyət eyni zamanda müəllimlərinin peşəkarlığının və valideynlərinin dəstəyinin nəticəsidir.

Məktəb kollektivi adından Eminə Mirzəyevanı bu əlamətdar uğur münasibətilə ürəkdən təbrik edir, ona gələcək təhsil həyatında daha böyük nailiyyətlər və yeni qələbələr arzulayırıq.

Uğurların davamlı olsun, Eminə! 🌹🏆📚

04/06/2026

“Tanınmış şəxsiyyətlər təqvimi” rubrikası çərçivəsində 9B sinfində görkəmli Azərbaycan heykəltəraşı Ömər Eldarovun yaradıcılığına həsr olunmuş tanışlıq dərsi keçirildi.

Dərs zamanı şagirdlərə Ömər Eldarovun həyat yolu, Azərbaycan təsviri sənətində və heykəltəraşlıq məktəbinin inkişafında göstərdiyi xidmətlər haqqında geniş məlumat verildi. Onun yaratdığı portret və monumental əsərlər, xüsusilə tanınmış şəxsiyyətlərin obrazlarının sənətkarlıqla işlənməsi şagirdlərin diqqətinə çatdırıldı.

Təqdimat zamanı slayd və nümunələr əsasında sənətkarın yaradıcılıq üslubu izah olundu, şagirdlərlə mövzu ətrafında müzakirələr aparıldı. Onlar öz fikirlərini bölüşərək suallara cavab verdilər və Ömər Eldarovun Azərbaycan mədəniyyətindəki yerini daha yaxından öyrəndilər.

Bu dərsin keçirilməsində məqsəd şagirdlərdə incəsənətə marağın artırılması, milli mədəni irsin tanıdılması və görkəmli şəxsiyyətlərin fəaliyyətinin təbliği olmuşdur.

03/06/2026

Altıncı siniflərdə tarix dərsində “Mən hüquqlarımı necə bilirəm” mövzusunda maarifləndirici dərs keçirildi.

Dərs zamanı şagirdlərə insan hüquqları və uşaq hüquqları haqqında ümumi məlumat verildi. Onlara yaşamaq hüququ, təhsil almaq hüququ, sağlamlıq hüququ, təhlükəsiz mühitdə böyümək hüququ kimi əsas hüquqlar izah olundu. Eyni zamanda hər bir hüququn qarşılığında vəzifələrin də olduğu diqqətə çatdırıldı.

Şagirdlərə gündəlik həyatdan nümunələr əsasında hüquqlarının pozulmaması və başqalarının hüquqlarına hörmətlə yanaşmağın vacibliyi izah edildi. Dərs zamanı sual-cavab və müzakirələr aparılaraq şagirdlərin mövzuya aktiv şəkildə cəlb olunması təmin edildi.

Bu dərsin məqsədi şagirdlərdə hüquqi maarifləndirməni artırmaq, onların öz hüquqlarını daha yaxşı tanımasına və cəmiyyət daxilində məsuliyyətli davranış formalaşdırmasına dəstək olmaq idi.

01/06/2026

İyun – Uşaqların Beynəlxalq Müdafiəsi Günü münasibətilə tədbir

1 İyun – Uşaqların Beynəlxalq Müdafiəsi Günü münasibətilə məktəbimizdə IV sinif şagirdlərinin iştirakı ilə “Dünyanın hər yerində xoşbəxt olsun uşaqlar” adlı tədbir keçirildi.

Tədbir Azərbaycan Respublikasının Dövlət Himninin səsləndirilməsi ilə başladı. Ardınca Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edildi.

Tədbirin gedişində şagirdlər tərəfindən müxtəlif şeirlər səsləndirildi, Azərbaycan milli rəqsləri və dünya musiqilərindən ibarət rəqs kompozisiyaları nümayiş olundu. Uşaqların rəngarəng çıxışları, sevinc dolu ifaları və səhnə mədəniyyəti tədbir iştirakçılarında xoş təəssürat yaratdı.

Sonda IV sinif şagirdlərinin təqdimatında maraqlı mahnı və rəqs nömrələri nümayiş etdirildi. Tədbirin yekununda uşaqların sülh, dostluq və xoşbəxt gələcək arzularını ifadə edən ağ göyərçinlər və rəngarəng şarlar səmaya buraxıldı. Bu duyğulu və yaddaqalan an tədbir iştirakçıları tərəfindən böyük maraqla qarşılandı.

Tədbirdə vurğulandı ki, uşaqlar cəmiyyətimizin ən dəyərli sərvəti, ölkəmizin parlaq gələcəyidir. Qoy dünyanın hər yerində uşaqlar sevgi, qayğı və əmin-amanlıq içində yaşasınlar. 🌍🕊️👧👦

18/05/2026

15/05/2026

Bu gün məktəbimizin həkimi Əbdürəhimova Bəyaz və tibb bacısı Tahirova Aybəniz xanım tərəfindən yuxarı sinif şagirdləri ilə “Erkən nikaha son” mövzusunda maarifləndirici görüşlər keçirildi.

Görüş zamanı erkən nikahın fəsadları, gənclərin təhsil hüquqları, sağlam həyat tərzi və gələcək planlarının düzgün qurulmasının vacibliyi barədə şagirdlərə ətraflı məlumat verildi. Şagirdlərlə mövzu ətrafında fikir mübadiləsi aparıldı, onları maraqlandıran suallar cavablandırıldı.

Maarifləndirici görüşlərin keçirilməsində əsas məqsəd şagirdlərin sağlam və düzgün gələcək formalaşdırmasına dəstək olmaq, onların hüquq və vəzifələri barədə məlumatlılığını artırmaq olmuşdur.