260 nömrəli tam orta məktəb

08 iyun 2026-cı il tarixində Bakı şəhəri Baş Polis İdarəsinin Dövlət Yol Polisi İdarəsi və 1 nömrəli Uşaq-Gənclər İnkişaf Mərkəzinin birgə təşkilatçılığı ilə “Yol hərəkəti qaydalarını öyrənək” adlı intellektual yarış keçirilib.
Yarışın məqsədi uşaqlarda yol hərəkəti qaydalarına dair biliklərin artırılması, yol təhlükəsizliyi ilə bağlı məsuliyyətli davranış vərdişlərinin formalaşdırılması və təhlükəsiz hərəkət mədəniyyətinin aşılanması olub.
Tədbirdə Bakı şəhərinin müxtəlif ümumtəhsil məktəblərinin komandaları ilə yanaşı, İlqar Cəfərov adına 260 nömrəli tam orta ümumtəhsil məktəbinin “Hərəkət” komandası da iştirak edib. Şagirdlər yarış zamanı yol hərəkəti qaydalarına dair biliklərini nümayiş etdirərək məktəbi layiqincə təmsil ediblər.
Yarış iştirakçılar arasında böyük maraq doğurub, şagirdlərin yol hərəkəti təhlükəsizliyi sahəsində bilik və bacarıqlarının inkişafına töhfə verib. Tədbirin sonunda iştirakçılara təşəkkür edilib, qaliblər diplomlarla təltif olunublar.
Belə maarifləndirici tədbirlər şagirdlərdə yol hərəkəti qaydalarına əməl etmək vərdişlərinin formalaşdırılması və təhlükəsiz həyat tərzinin təbliği baxımından mühüm əhəmiyyət daşıyır.

Yeni təmayül tədris modelinə qeydiyyat başlayıb

Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən tam orta ümumtəhsil müəssisələrində X-XI siniflər üçün nəzərdə tutulan yeni təmayül tədris modelinə şagird və müəllimlərin qeydiyyatı başlayıb.

Modelin əsas məqsədi şagirdlərin əlavə hazırlıq kurslarına ehtiyac duymadan məktəbdə təşkil olunan gücləndirilmiş tədris prosesi vasitəsilə ali təhsil müəssisələrinə qəbul üçün zəruri bilik və bacarıqlara yiyələnməsini təmin etməkdir.

Qeydiyyat prosesində BŞTİ-nin tabeliyində fəaliyyət göstərən tam orta ümumtəhsil müəssisələrinin X və XI sinif şagirdləri iştirak edə bilərlər.

Tədris prosesinin keyfiyyətinin yüksəldilməsi məqsədilə qabaqcıl pedaqoji təcrübəyə malik müəllimlər də yeni təmayül tədris modelinə cəlb olunacaqlar. Seçim zamanı peşəkarlıq, pedaqoji fəaliyyət göstəriciləri və tədrisin keyfiyyətinə təsir edən digər meyarlar nəzərə alınacaq.

Yeni təmayül tədris modelində iştirak etmək istəyən şagird və müəllimlər elektron sistem vasitəsilə müraciət edə bilərlər.

Şagirdlər üçün qeydiyyat:
https://docs.google.com/forms/d/e/1FAIpQLSfH-gbLr4r0Hf5p2IRbbbZqURFZUcSA6A72Gz1qytwUT9_xcQ/viewform?usp=publish-editor

Müəllimlər üçün qeydiyyat:
https://docs.google.com/forms/d/e/1FAIpQLScbzg-UGJSydggPrLl4Eo1shd-FeVCrkLVrWaY9zA8ZIGuiFw/viewform?usp=header

Azərbaycan Respublikası Elm və Təhsil Nazirliyinin müvafiq təlimatına əsasən, 13 iyun 2026-cı il tarixində İlqar Cəfərov adına 260 nömrəli tam orta ümumtəhsil məktəbində “Son zəng” tədbiri keçirilmişdir.
Tədbirdə məzunlarla yanaşı məktəb rəhbərliyi, pedaqoji heyət və valideynlər iştirak etmişlər.
Tədbir Azərbaycan Respublikasının Dövlət Bayrağının gətirilməsi və Dövlət Himninin səsləndirilməsi ilə açıq elan olunmuşdur. Daha sonra Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilmişdir.
Bu il məktəbi ümumilikdə 65 nəfər məzun bitirmişdir. Məktəbin direktoru çıxış edərək məzunları təbrik etmiş, qəbul imtahanlarında və təhsil sahəsində yüksək nəticələr göstərən şagirdlərə uğurlar arzulamışdır.
Tədbirin bədii hissəsində XI sinif şagirdləri tərəfindən maraqlı rəqs nömrələri və musiqili kompozisiyalar təqdim olunmuşdur. Valideynlər çıxış edərək müəllim kollektivinə minnətdarlıqlarını bildirmiş, məzunlara gələcək həyatlarında uğurlar arzulamışlar.
Sonda “Son zəng”in rəsmi simvolu olan zəng səsləndirilmiş, məzunlar məktəb illəri ilə vidalaşaraq yeni həyat mərhələsinə qədəm qoymuşlar.

Xətai rayonu İlqar Cəfərov adına 260 nömrəli tam orta ümumtəhsil məktəbində şagirdlərin fiziki fəallığının artırılması, sağlam həyat tərzinin təşviqi və idman mühitinin gücləndirilməsi məqsədilə “Ayın idman növü” layihəsi çərçivəsində may–iyun aylarında “Velosiped üzrə məktəbdaxili yarışlar” keçirilmişdir.
Velosiped ayı ərzində 5–10-cu sinif şagirdləri arasında maraqlı və rəqabətli yarışlar təşkil olunmuş, şagirdlər öz bacarıq və çevikliklərini nümayiş etdirmişlər. Yarışların sonunda qalib iştirakçılar müəyyən edilərək diplom və hədiyyələrlə mükafatlandırılmışlar. Tədbirin keçirilməsində əsas məqsəd şagirdlər arasında sağlam həyat tərzinin təbliği, idmana marağın artırılması və asudə vaxtın səmərəli təşkili olmuşdur.

Məktəbin tədbirlər planına uyğun olaraq “İdman aylığı” (may–iyun) çərçivəsində Xətai rayonu İlqar Cəfərov adına 260 nömrəli tam orta ümumtəhsil məktəbində şagirdlər arasında 100 metr məsafəyə qaçış yarışı keçirilmişdir.
Yarışın keçirilməsində məqsəd şagirdlərin fiziki hazırlıq səviyyəsinin artırılması, sağlam həyat tərzinin təbliği və idmana marağın gücləndirilməsi olmuşdur. Yarışın hakimləri fiziki tərbiyə müəllimləri Səidə Əmirova və Allahverdi Əsgərli olmuşlar. Şagirdlər yarış zamanı yüksək fəallıq nümayiş etdirmiş, qaliblər məktəb rəhbərliyi tərəfindən diplomlarla mükafatlandırılmışlar. Tədbir iştirakçılar tərəfindən böyük maraqla qarşılanmışdır.

03.06.2026-cı il tarixində İlqar Cəfərov adına 260 nömrəli tam orta ümumtəhsil məktəbin 8A sinfində sinif rəhbəri Sevinc Həsənova tərəfindən “İnsan Hüquqları” Aylığı çərçivəsində maarifləndirici söhbət keçirilmişdir.
Tədbir zamanı şagirdlərlə insan hüquqları mövzusunda fikir mübadiləsi aparılmış, onlar öz hüquqlarını səsləndirmiş və bu hüquqların cəmiyyətdəki əhəmiyyəti haqqında müzakirələr etmişlər. Şagirdlər mövzu ilə bağlı hazırladıqları təqdimatları nümayiş etdirərək insan hüquqları sahəsində əldə etdikləri bilikləri bölüşmüşlər.
Tədbirin əsas məqsədi şagirdlərdə hüquqi maarifləndirməni artırmaq, onların hüquq və vəzifələri haqqında məlumatlarını genişləndirmək olmuşdur.

İ. Cəfərov adına 260 nömrəli tam orta ümumtəhsil məktəbində “İnsan Hüquqları Aylığı” çərçivəsində 7B sinfində sinif rəhbəri Hüseynova Şəhanə tərəfindən təşkilat saatı keçirilmişdir. Təşkilat saatında şagirdlərə insan hüquqlarının mahiyyəti, uşaqların əsas hüquqları, hüquq və vəzifələrin qarşılıqlı əlaqəsi haqqında məlumat verilmiş, mövzu ətrafında müzakirələr aparılmışdır. Məqsəd şagirdlərdə hüquqi maarifləndirmənin artırılması və insan hüquqlarına hörmət hissinin formalaşdırılması olmuşdur.

03.06.2026-cı il tarixində İ. Cəfərov adına 260 nömrəli tam orta ümumtəhsil məktəbinin 5A sinfində sinif rəhbəri Çinarə Əhmədli tərəfindən “İnsan Hüquqları” Aylığı çərçivəsində maarifləndirici tədbir keçirilmişdir.

Tədbirdə şagirdlərlə insan hüquqları, uşaqların hüquq və vəzifələri mövzusunda müzakirələr aparılmış, onların malik olduqları əsas hüquqlar izah edilmiş və vəzifələri xatırladılmışdır. Şagirdlər Azərbaycan Respublikasının Konstitusiyasının insan hüquqları ilə bağlı bəzi müddəaları ilə tanış olmuşlar.

Tədbirin sonunda şagirdlər insan hüquqlarına həsr olunmuş maarifləndirici video izləmişlər.

Mədəniyyət Nazirliyinin layihəsi olan “Min səs, bir Vətən” adlı tədbir çərçivəsində 1 İyun – Uşaqların Beynəlxalq Müdafiəsi Günü münasibətilə Qış parkında bayram proqramı keçirilmişdir.
Tədbirdə Bakı şəhəri üzrə musiqi və incəsənət məktəblərinin şagirdləri iştirak etmiş, dövlət səviyyəsində təşkil olunan proqram dron çəkilişi ilə müşayiət olunmuşdur. Şagirdlər tərəfindən müxtəlif musiqi nömrələri və kollektiv ifalar təqdim edilmişdir.
Tədbirdə İ. Cəfərov adına 260 nömrəli tam orta ümumtəhsil məktəbin şagirdi, eyni zamanda Süleyman Ələsgərov adına 1 nömrəli Uşaq İncəsənət Məktəbinin şagirdi Yusif Məmmədov da kollektiv ifa ilə çıxış etmişdir. Şagirdlərin rəngarəng çıxışları bayram ab-havasına xüsusi sevinc və rəng qatmışdır.
Tədbirin sonunda iştirakçılar Musiqi və incəsənət təhsili sektorunun müdiri Altun Rəcəbli ilə xatirə şəkli çəkdirmişlər.