Skautinq şagirdlərin həyat tərzi kimi

Təhsildə qrantlar, təşəkkür edirik!

Skautinq – şagirdlərin həyat tərzi kimi” layihəsinin bağlanış mərasimi keçirildi.

Elm və Təhsil Nazirliyinin Təhsildə İnkişaf və İnnovasiyalar üzrə 8-ci qrant müsabiqəsinin fərdi kateqoriyası üzrə qalibi olan “Skautinq – şagirdlərin həyat tərzi kimi” layihəsinin yekun tədbiri keçirildi. Tədbirdə məktəb rəhbərliyi, Azərbaycan Skautlar Assosiasiyasının nümayəndələri, qonşu məktəblərin müəllimləri, skautlar və onların valideynləri iştirak etdilər. Mərasim zamanı layihə çərçivəsində həyata keçirilmiş fəaliyyətlərin təqdimatı nümayiş etdirildi, şagirdlərin ifasında çıxışlar, mahnılar və rəqslər tədbirə xüsusi rəng qatdı.
Layihə rəhbəri Aynur İbrahimova çıxış edərək 9 ay ərzində görülən işlər, əldə olunan nəticələr və qurulan uğurlu əməkdaşlıqlardan danışdı. O, bütün tərəfdaşlara, iştirakçılara və dəstəkçilərə təşəkkürünü bildirdi.

Xatırladaq ki, layihənin əsas məqsədi skautinqi məktəbdənkənar fəaliyyətlər vasitəsilə şagirdlərin gündəlik həyat tərzinə çevirmək, onlarda liderlik, komanda işi, sosial münasibətlər və məsuliyyət bacarıqlarını gücləndirmək idi. Bu məqsədlə həyata keçirilən təlimlər, düşərgələr və ictimai fəaliyyətlər nəticəsində skautinq artıq bu məktəbin şagirdləri üçün sadəcə fəaliyyət deyil, bir həyat tərzinə, davranış modelinə, dəyər sisteminə çevrildi.

Layihə sübut etdi ki, düzgün istiqamətləndirilmiş və davamlı dəstəklənən məktəbdənkənar fəaliyyətlər şagirdlərin şəxsiyyətinin formalaşmasında, məktəb mühitinin sağlamlaşmasında və təlim-tərbiyə prosesinin mənalandırılmasında mühüm rol oynayır. “Skautinq – şagirdlərin həyat tərzi kimi” layihəsi yalnız bu məktəbdə deyil, bütövlükdə məktəb həyatı ilə şəxsiyyət inkişafını vəhdətdə düşünənlər üçün nümunə olacaq bir uğur hekayəsinə çevrildi.

̈sabiqəsi

Azərbaycan Respublikası Elm və Təhsil Nazirliyi
Çox təşəkkür edirik!

Liderlik, dostluq və həyat bacarıqları ilə zəngin 3 günlük düşərgə

Elm və Təhsil Nazirliyinin elan etdiyi Təhsildə innovasiyalar üzrə VIII qrant müsabiqəsinin fərdi kateqoriya üzrə qalibi olan “Skautinq: şagirdlərin həyat tərzi kimi” layihəsi çərçivəsində Azərbaycan Skautlar Assosiasiyasının təşkilatçılığı ilə Şamaxı Olimpiya İdman Kompleksində 14-15-16 iyun tarixində üç günlük unudulmaz skaut düşərgəsi təşkil olundu.

Düşərgədə Bakı şəhəri 217 nömrəli tam orta məktəbin seçilmiş mauqli yaş qruplu 30 şagirdi, layihə rəhbəri Aynur İbrahimova, skaut təlimçiləri Rüqayə Məmmədova, Aygün Rəşidova, İslam Şükürov və s iştirak etdilər. Skautlar 3 gün müddətində 6 patrula bölünərək düşərgənin idarəsində, tapşırıqların yerinə yetirilməsində və fəaliyyətlərin təşkili prosesində fəal rol aldılar.

Proqram boyunca skautlara “Duyğuların buzdağı” və “Səmti müəyyən etmə və istiqamət nişanları” mövzularında həm nəzəri, həm də praktik təlimlər keçirildi. İştirakçılar komanda oyunları, idman yarışları və strategiyaya əsaslanan tapşırıqlarda bacarıqlarını göstərdilər.

Axşam saatlarında isə tongal ətrafında skautların bədii çıxışları düşərgəyə xüsusi ruh qatdı. Patrullar öz səhnəcikləri, parodiyaları, musiqi və rəqsləri ilə əsl bayram əhval-ruhiyyəsi yaratdılar. Açıq hava şəraitində təşkil olunan pikniklər və Şamaxı Tarix-Diyarşünaslıq Muzeyi, M.Ə.Sabirin ev muzeyinə ekskursiyalar uşaqların həm öyrənməsinə, həm də əylənməsinə şərait yaratdı.

Düşərgənin sonunda fəal və məsuliyyətli skautlar xüsusi olaraq təltif olundular. Skautlar bu düşərgədə yalnız iştirakçı deyil, eyni zamanda təşəbbüskar, lider və təşkilatçı kimi yetişdilər.

Layihənin rəhbəri – Bakı şəhəri 217 nömrəli tam orta məktəbin təlim-tərbiyə işləri üzrə direktor müavini Aynur İbrahimovadır.
Qeyd edək ki, layihənin məqsədi — şagirdlərin həyat bacarıqlarını inkişaf etdirmək, onları liderliyə, birgəyaşayış mədəniyyətinə və vətənə faydalı fərd kimi formalaşdırmaqdır.

̈sabiqəsi

Skautlarla Novruz: Milli Dəyərlər və Birlik Ruhunda Təlim

Elm və Təhsil Nazirliyinin “Təhsildə İnkişaf və İnnovasiyalar” müsabiqəsinin qalibi olan “Skautinq – Şagirdlərin Həyat Tərzi” layihəsi çərçivəsində təlimlərimiz uğurla davam edir.

“Xunsar” Skaut Klubunun 30 üzvü Novruz bayramı ilə əlaqədar keçirilən təlimdə iştirak etdi.
Təlimçi Aygül Rəşidova tərəfindən öncə milli dəyərlərimiz, Novruz adət-ənənələri və bayramın mahiyyəti haqqında nəzəri bilgilər verildi. Daha sonra skautlar bayram ruhunu əks etdirən milli geyimlərdə müxtəlif ənənəvi oyunlar və fəaliyyətlər həyata keçirdilər.

Təlim çərçivəsində kəndir oyunu, yumurta döyüşdürmə, birliyi və komanda ruhunu gücləndirən müxtəlif aktivliklər təşkil olundu. Bu fəaliyyətlər skautlara Novruzun birləşdirici gücünü hiss etdirdi, milli irsimizə və dəyərlərimizə olan sevgini daha da artırdı.

“Xunsar” Skaut Klubu olaraq milli dəyərlərimizi yaşatmaq və gələcək nəsillərə ötürmək üçün fəaliyyətlərimizi davam etdiririk! 🌿🔥

Azərbaycan Respublikası Elm və Təhsil Nazirliyi Təhsildə İnkişaf və İnnovasiyalar üzrə Vlll qrant müsabiqəsinin qalibi olmuş
“Skautinq – Şagirdlərin Həyat Tərzi kimi” layihəsi çərçivəsində “Xunsar” Skaut Klubunun üzvləri üçün “Emosional Davranış” adlı təlim keçirildi. Təlim Aygün Rəşidova tərəfindən aparıldı və şagirdlərin emosional reaksiyaları, davranış xüsusiyyətləri və xarakterləri təhlil edildi.

Təlimin əsas məqsədi skautların duyğularını anlamaq, idarə etmək və düzgün yönləndirmək bacarıqlarını inkişaf etdirmək idi. Emosional intellekt skautların komanda işində uğurlu olması üçün vacib amillərdən biridir. Gərgin situasiyalarda soyuqqanlı qalmaq və rasional qərarlar qəbul etmək onların liderlik keyfiyyətlərini gücləndirir. Təbiət yürüşləri, düşərgələr və müxtəlif ictimai tədbirlər zamanı bu bacarıqlar olduqca faydalıdır. Təlim iştirakçıları müxtəlif emosional vəziyyətlərə uyğun reaksiya verməyi praktik məşğələlər vasitəsilə öyrəndilər.
Skautlar duyğularını idarə etməyi bacardıqda daha güclü və inamlı fərdlərə çevrilirlər. Bu cür təlimlər onların həm şəxsi, həm də sosial inkişafına müsbət təsir göstərir.

Layihənin rəhbəri Bakı şəhəri 217 nömrəli məktəbin direktor müavini Aynur İbrahimovadır.
Təhsildə qrantlar

Skautinq şagirdlərin həyat tərzi kimi layihəsi çərçivəsində ekskursiyalarımız davam edir!

Tarixə açılan qapıdan keçmək istəyənlər üçün unudulmaz bir ünvan – Tağıyevin sarayı!

Skautlar bu dəfə yolunu Bakının mərkəzində yerləşən möhtəşəm bir tarixi məkana – Hacı Zeynalabdin Tağıyevin ev muzeyinə saldı. 30 nəfərlik skaut heyəti saraya qədəm qoyaraq bir anlıq keçmişə səyahət etdi. Tağıyevin milli maarifçiliyə, qadın təhsilinə və xalqın rifahına verdiyi töhfələr ekskursiya iştirakçılarında dərin maraq doğurdu. Muzeydə nümayiş olunan eksponatlar, o dövrün ruhunu əks etdirən interyer və dahi xeyriyyəçinin irsi onları valeh etdi. Tarixin izlərini bu qədər yaxından görmək və hiss etmək skautlar üçün unudulmaz bir təcrübəyə çevrildi. Hər bir otaq bir dövrün nağılını danışır, hər bir detal o böyük şəxsiyyətin izlərini yaşadırdı. Gənclər bu ekskursiya sayəsində tarixə sahib çıxmağın vacibliyini bir daha dərk etdilər. Tağıyevin sarayı təkcə bir bina deyil, keçmişin səsi, milli ruhun aynası idi.

Xatırladaq ki, layihə rəhbəri Bakı şəhəri E. Sultanov adına tam orta məktəbin təlim-tərbiyə işləri üzrə direktor müavini Aynur İbrahimovadı.
Təhsildə qrantlar