08/07/2026
“MALİYYƏ VƏ MÜHASİBAT” FAKÜLTƏSİNDƏ ABİTURİYENTLƏR ÜÇÜN “AÇIQ QAPI” GÜNÜ KEÇİRİLİB
Ali təhsil müəssisələrinə qəbul imtahanlarında iştirak edərək təhsilinin növbəti mərhələsinə hazırlaşan abituriyentlərin gələcək ixtisas seçiminə dəstək göstərilməsi, onların universitet mühiti, təhsil imkanları və karyera perspektivləri barədə ətraflı məlumatlandırılması məqsədilə Azərbaycan Dövlət İqtisad Universitetinin (UNEC) “Maliyyə və mühasibat” fakültəsində “Açıq qapı” günü keçirilib.
Tədbiri giriş sözü ilə “Maliyyə və mühasibat” fakültəsinin dekanı dosent Hafis Hacıyev açaraq, ali təhsil seçimində düzgün qərar verməyin əhəmiyyətindən danışıb, “Açıq qapı” gününün əsas məqsədinin abituriyentləri fakültənin tədris prosesi, elmi potensialı, beynəlxalq əməkdaşlıq əlaqələri və gələcək karyera imkanları ilə yaxından tanış etməkdən ibarət olduğunu bildirib, fakültədə müasir əmək bazarının tələblərinə cavab verən, peşəkar bilik və bacarıqlara malik maliyyəçi və mühasiblərin hazırlanmasına xüsusi önəm verildiyini qeyd edib, tədris prosesində nəzəri biliklərlə yanaşı praktik hazırlığın gücləndirilməsi, rəqəmsal texnologiyaların tətbiqi, analitik düşüncə və peşə etikasının tələbələrin hazırlığının əsas istiqamətlərindən biri olduğunu vurğulayıb.
Tədbir çərçivəsində iştirakçılara Universitetin və fakültənin infrastrukturu, tədris olunan ixtisaslar, UNEC-də tətbiq edilən təhsilin idarəetmə sistemi, akademik təqvim, tədris prosesinin və imtahanların təşkili, həyata keçirilən təqaüd, mübadilə və beynəlxalq ikili diplom, UDİD və MİNOR proqramları, “Bir pəncərə” xidməti, Kitabxana-İnformasiya Mərkəzi, fəaliyyət göstərən tələbə təşkilatları və s. barədə ətraflı məlumat verilib.
Daha sonra abituriyentlər fakültənin auditoriyaları, kompüter laboratoriyaları və digər tədris məkanları ilə tanış olublar. Onlara müasir təhsil mühitində yaradılan imkanlar, tələbələrin elmi-tədqiqat fəaliyyəti, sosial həyatı, müxtəlif layihələrdə və beynəlxalq proqramlarda iştirakı, eləcə də şəxsi inkişaf istiqamətləri barədə məlumat təqdim edilib.
Görüş zamanı abituriyentlərin sualları cavablandırılıb. İştirakçıları maraqlandıran qəbul prosesi, ixtisas seçimi, təhsil müddətində əldə edilə biləcək imkanlar, təcrübə proqramları və məzunların karyera perspektivləri ilə bağlı məsələlər ətrafında fikir mübadiləsi aparılıb.
