25/03/2026
Təhsildə ən böyük problemlərdən biri odur ki, biz çox vaxt nəticələri müzakirə edirik, səbəbləri yox.
Hamı deyir ki, keyfiyyət aşağı düşür. Amma az adam soruşur: niyə?
Gəlin açıq danışaq.
Bir müəllim peşəsini bilmirsə və ya illərlə öz üzərində işləmirsə, bu artıq fərdi problem deyil — sistem problemidir. Çünki həmin müəllim ya düzgün seçilməyib, ya da işlədiyi müddətdə inkişaf etdirilməyib.
Məktəblərə baxaq:
Müəllimin nəyə ehtiyacı olduğunu ölçən mexanizm yoxdur. Hamıya eyni təlim verilir, fərdi yanaşma isə demək olar ki, mövcud deyil. Rəğbətləndirmə sistemi isə çox vaxt formal xarakter daşıyır.
Müəllimlərə baxaq:
Bəziləri həqiqətən öyrənmək istəyir, inkişaf edir. Amma bəziləri üçün müəllimlik sadəcə iş yeridir. İnkişafa daxili ehtiyac hiss olunmur.
Belə bir mühitdə keyfiyyətin yüksəlməsini gözləmək nə qədər realdır?
Son dövrlərdə sertifikasiya imtahanı ətrafında çox müzakirələr gedir. Məncə, bu prosesin bir müsbət tərəfi var:
Ən azı minimal biliyi olmayan müəllimləri müəyyənləşdirir və bir mesaj verir — bu sahədə qalmaq üçün inkişaf etmək lazımdır.
Amma gəlin özümüzü aldatmayaq:
Tək sertifikasiya ilə keyfiyyət artmayacaq.
Əgər müəllimə inkişaf üçün real imkan, dəstək və motivasiya verilmirsə, sadəcə yoxlama ilə nəticə dəyişməyəcək.
Bəlkə də əsas sual budur:
Biz müəllimdən inkişaf tələb edirik, amma onun inkişaf etməsi üçün şərait yaradırıqmı?
.edu.az
