AMK nəzdində Musiqi Kolleci

26.05.2026-cı il tarixində Azərbaycan Milli Konservatoriyasının nəzdində Musiqi Kollecində Konsertmeyster sinfi müəllimləri Şahanə Babayeva və Vəsminaz Xəlilovanın sinif konserti keçirildi.
Konsertdə tələbələr müxtəlif bəstəkarların əsərlərini ifa etdilər. Tələbələrin ifa bacarıqları tamaşaçılar tərəfindən maraq və alqışla qarşılandı.
Konsertin keçirilməsində əsas məqsəd tələbələrin səhnə təcrübəsinin artırılması, onların musiqi zövqünün və ifaçılıq qabiliyyətinin inkişaf etdirilməsi olmuşdur. Tədbir xoş və yaddaqalan musiqi proqramı ilə xatirələrə həkk oldu.

14.05.2026-cı il tarixində Birləşmiş Krallıqda baş tutan ənənəvi “Vindzor Kral Atçılıq Şousu”nda Azərbaycan geniş nümayəndə heyəti ilə təmsil olunub. Azerbaijan – Land of Fire" (Azərbaycan – Odlar Yurdu) adlı şou-kompozisiyada atların zərifliyi ilə yanaşı, milli musiqimiz, rəqslərimiz və orkestrin ifaları nümayiş olunub. Dahi bəstəkar Üzeyir Hacıbəylinin ölməz yaradıcılığının şah əsərlərindən sayılan, klassik Azərbaycan musiqisinin incisi olan “Arşın mal alan” operettasının ecazkar musiqisi əsasında hazırlanmış rəngarəng kompozisiyanın təqdimatı yüksək peşəkarlıq və zəngin səhnə həlli ilə seçilmişdir.Sevindirici haldır ki, tədbirin bədii rəhbəri əməkdar artist Gövhər Həsənzadə, nümunəvi Hərbi Orkestrin baş dirijoru əməkdar artist,polkovnik-leytenant Səməd Vəkilov, "Gülçöhrə" obrazının ifaçısı əməkdar artist Afaq Abbasova, "Əskər" obrazını canlandıran “Tərəqqi” medallı Fəxri Kazım-Nicat musiqi kollecimizin yetirmələri - məzunları olmuşlar. Qeyd etməliyik ki, Afaq Abbasova, Səməd Vəkilov müxtəlif illərdə kollecdə pedaqoji fəaliyyət göstərmiş, Fəxri Kazım-Nicat isə hal hazırda kollecimizdə “Vokal” ixtisası üzrə müəllim kimi çalışır.
Tədbirdə iştirak edən İngiltərə kralı III Charles Azərbaycan nümayəndə heyətini hörmət və ehtiramla qarşılamış, “Azerbaijan – Land of Fire” şou-kompozisiyasını yüksək maraqla izləmişdir.

26.05.2026-cı il tarixində Azərbaycan Milli Konservatoriyasının nəzdində Musiqi Kollecində müxtəlif ixtisaslar üzrə fəaliyyət göstərən müəllimlərin “Şəhərsalma və memarlıq ili” çərçivəsində konserti keçirildi.1 gün öncə Azərbaycan Milli Konservatoriyasının Fikrət Əmirov zalında tələbələrimizin uğurlu çıxışından sonra onların ustad müəllimlərinin Musiqi Kollecinin Böyük zalında yüksək peşəkarlıqla təqdim etdikləri musiqi nömrələri həqiqətən bu tədris müəssisəsində formalaşan zəngin musiqi ənənələrinin və yüksək ifaçılıq məktəbinin bariz nümunəsi idi. 25 il bu kollecə rəhbərlik edən əməkdar incəsənət xadimi, professor Nazim Kazımov uzun illərin təcrübəsinə əsaslanaraq kadr seçimində düzgün siyasət yürütmüş, bu təhsil müəssisəsinin yetişdirdiyi istedadlı tələbələrlə peşəkar və istedadlı müəllim heyətinin formalaşmasına nail olmuşdur.
“Xalq çalğı alətləri” (qarmon,nağara ixtisasları) fənn birləşmə komissiyasının sədri Kənan Əsədov və şöbənin müəllimləri Sərvan Cəbrayılov, Abil Məmmədov, Nicat Mahmudov, Xəyal Abbasov, Azər Məlikov, Razi Orucov “Xanlari” və “Sevinci”rəqslərinin möhtəşəm ifası ilə konsert proqramının açılışını etdilər. Fortepiano ixtisası üzrə müəllimlər Lalə Kərimova, Şəbnəm Ağayeva, Aygül Quliyeva, Səmimət Salahova,Aytən Babayeva,Cəmalə Abdinzadə, Nərmin Əliyeva, İlahə Salmanzadə, Leyla Dadaşzadə, Ləman Azaqova, Səmimət Salahova,Vəsminaz Xəlilova, Pərviz Məmmədov, violin ixtisası üzrə Qəmərxanım Məmmədova , Tar ixtisası üzrə əməkdar artist Davud Abdullayev, Çingiz Ağazadə, qanun ixtisası üzrə Nigar Hacızadə, vokal müəllimi “Tərəqqi” medallı Fəxri Kazım-Nicat öz ifaları ilə müəllimlik peşəkarlığını və sənətkarlıq səviyyələrini nümayiş etdirdilər.
Tədbirin sonunda kollecin direktoru əməkdar incəsənət xadimi, professor Nazim Kazımov müəllimlərini alqışlayaraq onların hər birinin bu səhnəyə gəldiyi ilk addımlarını xatırlatdı, tələbəlik illərində əldə etdikləri nailiyyətləri və sənət yollarındadakı inkişaf mərhələlərindən maraqlı faktlar danışdı. O, müəllimlərin sənətə verdiyi töhfəni yüksək qiymətləndirərək onlara gələcək fəaliyyətlərində uğurlar arzuladı.

25 may 2026-cı il tarixində Azərbaycan Milli Konservatoriyasında AMK nəzdində Musiqi Kolleci tələbələrinin “Müstəqillik günü”nə həsr olunmuş konserti keçirildi. Konsertdə Xalq Çalğı Alətləri orkestri – bədii rəhbər və dirijor Pərvin Mahmudova, “La Campanella” kamera orkestri – bədii rəhbər Qəmərxanım Məmmədova, “Həcəri” qanun ansamblı – bədii rəhbər Nigar Hacızadə, “Arzular” ansamblı- müəllimlər əməkdar artist Davud Abdullayev, əməkdar müəllim Arzu Səlimova, Nəfəsli alətlər ansamblı – bədii rəhbər Əbülfəz Həsənov, Xalq çalğı alətləri ansamblı – bədii rəhbər Eldar Rəcəbov, eləcə də solo nömrələr - Fortepiano ixtisası üzrə I kurs tələbəsi Vəliyev Arslan (müəllim Jalə Vəliyeva), orkestr alətləri (Truba)ixtisası üzrə I kurs tələbəsi Əhədov Əli (müəllim Aleksey prostinskiy), orkestr alətləri (Violin)ixtisası üzrə IIkurs tələbəsi Leyla Hüseynova ( müəllim Sona Ələsgərova), fortepiano ixtisası üzrə III kurs tələbəsi Nərgiz Rəsulova ( müəllim Esmira Əliyeva), xalq çalğı alətləri (kamança) ixtisası üzrə II kurs tələbəsi Aslanlı Ceyhun (müəllim əməkdar artist Elnur Əhmədov), fortepiano ixtisası üzrə III kurs tələbəsi Elza Eyvazova ( müəllim Yeganə İsmayılova) öz ifaları ilə yüksək peşəkarlıq nümayiş etdirdilər. Konsert boyu təqdim olunan çıxışlar tələbələrin yaradıcılıq potensialını, musiqiyə olan sevgisini və müəllimlərinin zəhmətini bir daha nümayiş etdirdi.
Tədbirin sonunda Azərbaycan Milli Konservatoriyasının rektoru, sənətşünaslıq doktoru, professor Kamilə Dadaşzadə çıxış edərək gənc ifaçıların milli musiqi ənənələrinin yaşadılması və inkişaf etdirilməsi istiqamətində göstərdikləri səylərin təqdirəlayiq olduğunu vurğulayaraq belə konsert proqramlarının tələbələrin peşəkar inkişafında mühüm rol oynadığını qeyd etdi. Kollecin direktoru əməkdar incəsənət xadimi, professor Nazim Kazımov çıxışında gənc musiqiçilərin əldə etdikləri nailiyyətlərin kollecdə aparılan məqsədyönlü tədris prosesinin nəticəsi olduğunu qeyd edərək tələbələrə gələcək fəaliyyətlərində uğurlar arzuladı. O, belə tədbirlərin gənclərin yaradıcılıq imkanlarının üzə çıxarılması və milli musiqi sənətinin təbliği baxımından mühüm əhəmiyyət daşıdığını qeyd etdi.

UNESCO-nun 80 illik, Qazaxıstan Respublikasının Qaraqanda vilayəti üzrə UNESCO Klubları Federasiyasının yaranmasının 10 illik yubileyi münasibətilə 19–22 may tarixlərində Qaraqanda şəhərində keçirilən “Sülh və Mədəniyyət naminə” adlı Beynəlxalq Forumda Azərbaycanı uğurla təmsil edən Cəfər Qafarlı müxtəlif beynəlxalq tədbirlərdə fəal iştirak etmişdir.
Forum çərçivəsində “UNESCO klublarının fəaliyyətində aktual istiqamətlər, nailiyyətlər və yeniliklər” mövzusunda Beynəlxalq elmi-praktik konfrans, Qazaxıstan Akademik Xalq Çalğı Alətləri Orkestrinin iştirakı ilə bayram konserti, həmçinin UNESCO klublarında görüşlər və ustad dərsləri təşkil olunmuşdur.
Tədbirdə Hindistan, Qırğızıstan, Özbəkistan və Qazaxıstanın nümayəndə heyətləri iştirak etmişlər. Azərbaycan nümayəndəsi kimi dəvət olunan Cəfər Qafarlı forum çərçivəsində keçirilən tədbirlərdə ölkəmizin musiqi və mədəniyyətini layiqincə təbliğ etmişdir.
Bayram konsertində onun tələbəsi, Azərbaycan Milli Konservatoriyasının nəzdində Musiqi Kollecinin I kurs tələbəsi İlknur Əlizadə S. Ələsgərovun “Daimi hərəkət” və N.Tlendiyevin “Əlkissa” əsərlərini orkestrin müşayiəti ilə uğurla ifa etmişdir.
Forumun növbəti günlərində Cəfər Qafarlı Qaraqanda şəhərinin 1 və 2 saylı UNESCO Klubu Uşaq Musiqi Məktəblərində, Botaqara şəhəri UNESCO Klubu Uşaq-Gənclər Yaradıcılıq Mərkəzi – İncəsənət Məktəbində, eləcə də Astana İncəsənət Universitetində ustad dərsləri keçmişdir. Dərslər zamanı iştirakçılarla milli musiqimizin xüsusiyyətləri, ifaçılıq ənənələri və pedaqoji təcrübə istiqamətində geniş fikir mübadiləsi aparılmışdır.
Səfər çərçivəsində müxtəlif ölkələrin musiqiçiləri və pedaqoqları ilə yaradıcılıq əlaqələri qurulmuş, beynəlxalq mədəni əməkdaşlığın inkişafı istiqamətində mühüm görüşlər keçirilmişdir. Tədbirin sonunda göstərdiyi fəaliyyətə görə Cəfər Qafarlı diplom, sertifikat və təşəkkürnamələrlə təltif olunmuşdur.

16 may 2026-cı il tarixində Beynəlxalq Muğam Mərkəzində Qəmərxanım Məmmədovanın bədii rəhbəri olduğu “La Campanella” kamera orkestrinin konserti keçirilmişdir.Qəmərxanım Məmmədova da kollecimizin yetişdirdiyi istedadlı məzunlardan biridir. O, həm kollecimizdə “Violin” ixtisası üzrə müəllim, həm də Azərbaycan Dövlət Akademik Opera və Balet teatrının simfonik orkestrində çalışır. Violin ifaçısı kimi müxtəlif beynəlxalq müsabiqə və festivallarda uğurla çıxış edərək həm ölkəmizi layiqincə təmsil etmiş, həm də öz peşəkarlığı ilə dinləyicilərin rəğbətini qazanmışdır. Musiqiyə həssas yanaşması, səhnə mədəniyyəti və yüksək ifaçılıq bacarığı onun sənət yolunda qazandığı nailiyyətlərin əsasını təşkil edir. Bu gün artıq o, yalnız uğurlu ifaçı kimi deyil, həm də gənc musiqiçilərin formalaşmasına töhfə verən peşəkar rəhbər kimi fəaliyyət göstərir. “La Campanella” kamera orkestrinin konsertində də Qəmərxanım müəllimənin zövqlü repertuar seçimi və kollektivlə işləmə bacarığı aydın hiss olunurdu. Azərbaycan və xarici bəstəkarların əsərləri Qəmərxanım Məmmədovanın tələbələri ilə birgə iştirak etdiyi “La Campanella” kamera orkestrinin ifasında yüksək peşəkarlıq və incə bədii zövqlə təqdim olundu. Proqramda səsləndirilən müxtəlif üslublu əsərlər orkestr üzvlərinin ansambl mədəniyyətini, ifaçılıq ustalığını və musiqi materialına yaradıcı yanaşmasını dolğun şəkildə nümayiş etdirdi.

19 may Şirvan şəhər Uşaq Musiqi Məktəbində Azərbaycan Milli Konservatoriyasının nəzdində Musiqi Kolleci və Şirvan-Salyan Regional Mədəniyyət İdarəsinin tabeliyində olan Şirvan şəhər Uşaq Musiqi Məktəbinin birgə təşkilatçılığı ilə “28 may - Respublika günü” münasibətilə konsert keçirilmişdir. Tədbirdə kollecin direktoru əməkdar incəsənət xadimi, professor Nazim Kazımov da iştirak etmişdir. Qeyd edək ki, Nazim müəllim əmək fəaliyyətinin 16 ilini bu məktəbdə “tar” ixtisası üzrə müəllim, tədris işləri üzrə direktor müavini, direktor vəzifələrində çalışmışdır. Konsertdə vaxtilə həmin məktəbin məzunu olmuş, musiqi kollecində “Fortepiano” ixtisası üzrə müəllim Esmira Əliyeva və tələbəsi Respublika və beynəlxalq müsabiqələr laureatları - III kurs tələbəsi Nərgiz Rəsulova, II kurs tələbəsi Humay Nəbizadə (müəllim İlhamə Xankişiyeva) Azərbaycan və dünya bəstəkarlarının əsərləri ilə çıxış etmişlər.
Konsertdə Şirvan şəhər Uşaq Musiqi Məktəbinin şagirdlərinin ifaları da tədbirə xüsusi rəng qatmış, onların təqdim etdikləri musiqi nömrələri də maraqla qarşılanmış, yüksək bayram ovqatı yaratmışdır. Konsert proqramı çərçivəsində səsləndirilən müxtəlif janrlı əsərlər gənc ifaçıların peşəkar hazırlığını, səhnə mədəniyyətini və musiqiyə olan dərin maraqlarını əyani şəkildə ortaya qoymuşdur.
Tədbirin sonunda Musiqi kollecinin müəllimiEsmira Əliyeva konsertin təşkil olunmasında bilavasitə rolu olan kollec və məktəb rəhbərliyinə öz təşəkkürünü bildirdirərək iştirakçıların hər birinə Aygül Qaradağlının “Klara R.Hits. Peter musiqi alətləri diyarında” kitabını hədiyyə elədi.
Kollecin direktoru Nazim Kazımov və Şirvan şəhər Uşaq Musiqi məktəbinin direktoru Əbülfət İsmayılov çıxış edərək bu cür tədbirlərin həm tələbə və şagirdlərin təcrübə mübadiləsinə geniş imkan yaratdığını bildirmış, iştirakçıların hər birinə uğurlar arzulamışlar. Nazim Kazımov eyni zamanda öz kitablarını: “Səid Rüstəmov”, “Asəf Zeynallı”, “Musiqi Kolleci-110” monoqrafiyalarını məktəbin direktoru Əbülfət İsmayılova təqdim etdi. Nazim müəllim AMK nəzdində Musiqi Kollecinin tələbələri ilə Şirvan şəhər Uşaq Musiqi Məktəbinin şagirdlərinin qarşılıqlı çıxışlarının iki təhsil ocağı arasında yaradıcı əməkdaşlığın və musiqi əlaqələrinin daha da möhkəmlənməsinə mühüm töhfə verdiyini bir daha vurğuladı.