https://www.facebook.com/100686041622434/

Zəngilan rayon 4 Nömrəli tam orta məktəb, Binəqədi rayonu VII mkr Ş. Məmmədov küç. 3075 məhəllə, Baku (2026)

Q: What is the address?

Binəqədi Rayonu VII Mkr Ş. Məmmədov Küç. 3075 Məhəllə

14/08/2026

Naxçıvanın sürətli sosial-iqtisadi inkişafı təmin ediləcək.

Naxçıvan Muxtar Respublikası Azərbaycanın ayrılmaz tərkib hissəsi kimi son illərdə həyata keçirilən ardıcıl və məqsədyönlü siyasət nəticəsində yeni inkişaf mərhələsinə qədəm qoyub. Regionun sosial-iqtisadi imkanlarının genişləndirilməsi, infrastrukturun yenilənməsi, müdafiə potensialının gücləndirilməsi, sənaye və məşğulluq imkanlarının artırılması istiqamətində görülən işlər Naxçıvanın gələcək inkişaf perspektivlərinin daha da geniş olduğunu göstərir.
Prezident İlham Əliyevin Naxçıvana səfərləri bu siyasətin ardıcıl xarakter daşıdığının mühüm göstəricilərindəndir. Dövlət başçısının avqust 2026-cı ildə Naxçıvan Muxtar Respublikasına səfəri zamanı Azərbaycan Televiziyasına verdiyi müsahibə Naxçıvanın gələcək inkişaf istiqamətlərinə, Azərbaycanın regional siyasətinə, təhlükəsizlik məsələlərinə, enerji və nəqliyyat strategiyasına dair mühüm mesajlarla zəngin olub. Dövlət başçısının səfər çərçivəsində Naxçıvan Sənaye Parkının təməlinin qoyulması, 300 meqavat gücündə istilik elektrik stansiyasının tikintisinin nəzərdə tutulması, günəş enerjisi layihələrinin genişləndirilməsi, DOST Mərkəzinin açılması, yeni sosial və nəqliyyat infrastrukturlarının yaradılması, Naxçıvan şəhərinin 2044-cü ilədək inkişafına dair Baş Planın təqdim olunması kimi mühüm tədbirləri xüsusi qeyd etməsi göstərir ki, Naxçıvanın inkişafı artıq ayrı-ayrı layihələr deyil, vahid və uzunmüddətli dövlət strategiyası əsasında həyata keçirilir.
Müsahibədə Naxçıvanın təhlükəsizliyi və müdafiə potensialının gücləndirilməsi məsələsi də xüsusi diqqət çəkib. Prezident İlham Əliyev Naxçıvanın Azərbaycanın əsas ərazisi ilə birbaşa quru əlaqəsinin olmamasını və onun xüsusi geostrateji mövqeyini nəzərə alaraq burada müdafiə imkanlarının daim diqqət mərkəzində saxlanıldığını bildirib. Əlahiddə Ümumqoşun Ordunun yaradılması, müasir silah və texnika ilə təchizat, komando bölmələrinin formalaşdırılması Naxçıvanın müdafiə qabiliyyətinin daha da artırılmasına xidmət edir. Bu yanaşma Azərbaycanın ümumi təhlükəsizlik siyasətinin tərkib hissəsidir və Naxçıvanın sabitliyinin onun sosial-iqtisadi inkişafının əsas şərtlərindən biri olduğunu göstərir.
Enerji məsələləri müsahibənin mühüm istiqamətlərindən biri olub. Prezidentin sözlərinə görə, Naxçıvanın enerji təhlükəsizliyinin təmin edilməsindən sonra əsas hədəf enerji ixracına keçməkdir. Hazırkı generasiya gücünün artırılması, 300 meqavatlıq istilik elektrik stansiyasının tikilməsi və Günəş elektrik stansiyalarının yaradılması Naxçıvanın gələcəkdə mühüm enerji istehsalçısına çevrilməsinə imkan verə bilər. Bununla yanaşı, Azərbaycanla Naxçıvan arasında Zəngəzur dəhlizi vasitəsilə nəqliyyat və enerji bağlantılarının yaradılması məsələsi xüsusi strateji əhəmiyyət daşıyır. Dəmir yolunun bərpası, yükdaşıma imkanlarının əhəmiyyətli dərəcədə artırılması, elektrik xətlərinin və digər kommunikasiya infrastrukturunun yaradılması Naxçıvanın regional nəqliyyat-logistika və enerji qovşağına çevrilməsi perspektivlərini gücləndirir.
Prezidentin müsahibəsində Naxçıvanın Qarabağ və Şərqi Zəngəzurla vahid inkişaf konsepsiyası çərçivəsində nəzərdən keçirilməsi də diqqətəlayiq məqamdır. Bu yanaşma Azərbaycanın müxtəlif bölgələrində həyata keçirilən quruculuq və inkişaf layihələrinin bir-birini tamamlamasına, yeni iqtisadi və nəqliyyat imkanlarının formalaşmasına xidmət edir. Naxçıvan şəhərinin 2044-cü ilədək inkişafına dair Baş Planın hazırlanması da gələcəyə hesablanmış şəhərsalma siyasətinin mühüm göstəricisidir. Sənaye parkının yaradılması, turizm infrastrukturunun genişləndirilməsi, kənd təsərrüfatı və suvarma layihələrinin həyata keçirilməsi, yeni yolların və nəqliyyat vasitələrinin istifadəyə verilməsi isə iqtisadi inkişafla əhalinin sosial rifahının yüksəldilməsini paralel şəkildə təmin etməyə yönəlib.
Naxçıvanın inkişafında tarixi-mədəni irsin qorunması və turizm potensialının reallaşdırılması da mühüm yer tutur. Möminə xatun türbəsində bərpa işlərinin aparılması, Əcəmi Naxçıvaninin abidəsinin ucaldılması, onun irsinin beynəlxalq səviyyədə tanıdılması ilə bağlı təşəbbüslər Naxçıvanın yalnız iqtisadi deyil, həm də mədəni əhəmiyyətini artırır. Yeni mehmanxana komplekslərinin yaradılması, şəhər infrastrukturunun yenilənməsi və turizm imkanlarının genişləndirilməsi isə qədim diyarın beynəlxalq turizm məkanlarından birinə çevrilməsi üçün yeni imkanlar yaradır. Bununla yanaşı, sosial evlər, DOST xidmətləri, nəqliyyat və yol layihələri dövlət siyasətinin mərkəzində insan amilinin dayandığını göstərir.
Beləliklə, Prezident İlham Əliyevin 11 avqust 2026-cı ildə Naxçıvanda Azərbaycan Televiziyasına verdiyi müsahibə Naxçıvanın gələcəyinə dair sistemli və uzunmüddətli dövlət strategiyasının əsas istiqamətlərini bir daha ortaya qoyub. Təhlükəsizlik və müdafiə imkanlarının gücləndirilməsi, enerji potensialının artırılması, Zəngəzur dəhlizi vasitəsilə nəqliyyat və kommunikasiya bağlantılarının yaradılması, sənaye və turizmin inkişafı, müasir şəhərsalma, sosial rifahın yüksəldilməsi və tarixi-mədəni irsin qorunması Naxçıvanın yeni inkişaf modelinin əsas istiqamətlərini təşkil edir. Bu proseslərin ardıcıl şəkildə həyata keçirilməsi Naxçıvanın Azərbaycanın iqtisadi və geostrateji imkanlarının genişlənməsində, regional nəqliyyat və enerji əlaqələrinin güclənməsində və ölkənin ümumi inkişaf strategiyasında daha mühüm mövqeyə yüksəlməsinə şərait yaradacaq.

Elnurə Kərimova

14/08/2026

Naxçıvan çox zəngin tarixə və mədəniyyətə, o cümlədən memarlıq mədəniyyətinə malikdir.

Bildiyimiz kimi Prezident İlham Əliyevin 11 avqust 2026-cı ildə Naxçıvana səfəri zamanı Azərbaycan Televiziyasına verdiyi müsahibə yayımlanmışdır.. Cənab Prezident müsahibəsində naxşıvana etdiyi mütəmadi etdiyi səfərlərindən eləcə də Naxçıvanın sürətli sosial-iqtisadi inkişafından və müdafiə potensialından söz açaraq qeyd etmişdir ki, Səfərim və səfər zamanı iştirak etdiyim tədbirlər özlüyündə bir göstəricidir. Bir daha göstərir ki, Naxçıvan Muxtar Respublikası hərtərəfli inkişaf edir. Prezident kimi 17-ci dəfədir ki, Naxçıvana səfər edirəm və hər səfərimin də böyük mənası və gözəl nəticələri vardır.
Bu illər ərzində bir çox önəmli layihələr icra olundu. Naxçıvanın ümumi inkişafı təmin edildi. Bugünkü tədbirlər də bir növ görülən işlərin davamıdır və təbii ki, bundan sonra da lazımi qərarlar veriləcək və Naxçıvanın sürətli sosial-iqtisadi inkişafı təmin ediləcək. Digər tədbirlərə gəldikdə, əlbəttə ki, burada xüsusilə iş yerlərinin yaradılması ilə bağlı görülən və görüləcək işləri qeyd edə bilərəm. Bu gün Naxçıvan Sənaye Parkının təməli qoyuldu. Azərbaycanda mənim göstərişimlə bir çox sənaye parkları yaradılmışdır və onların arasında ərazi nöqteyi-nəzərindən Naxçıvan Sənaye Parkı Sumqayıt Sənaye Parkından sonra ikincidir. Onu bildirməliyəm ki, bu gün Naxçıvanın generasiya gücü təqribən 200 meqavatdır. Təkcə bir stansiya bunu 1,5 dəfə artıracaq. Təbii ki, bu stansiyanın iki məqsədi var: birincisi, Naxçıvan Muxtar Respublikasını dayanıqlı enerji ilə təmin etmək, ikincisi, ixrac məsələləridir. Bununla paralel olaraq, qazlaşmanı apardıq. Artıq neçə ildir ki, - təqribən deyə bilərəm, bəlkə 15 il, bəlkə ondan da çox, - Naxçıvanda qazlaşma 100 faizdir. Azərbaycanda ümumilikdə qazlaşmanın səviyyəsi 96 faizdir, bu da çox böyük rəqəmdir. Ancaq Naxçıvanda bu, artıq 100 faizdir. Yəni bu da enerji təhlükəsizliyinə yönəlmiş bir addım idi. Burada bir çox su və Günəş elektrik stansiyaları, modul tipli elektrik stansiyası inşa edilmişdir. Yəni enerji təhlükəsizliyi fiziki təhlükəsizlikdən sonra ikinci vacib amildir. Bu gün dediyim kimi, həm 300 meqavat gücündə istilik elektrik stansiyasının təməli qoyuldu və 50 meqavat gücündə iki Günəş elektrik stansiyasının tikintisi ilə tanış oldum.
Bir neçə ay bundan əvvəl qəbul edilmiş kənd təsərrüfatının inkişafına dair Dövlət Proqramında da Naxçıvanın xüsusi yeri var. Bu gün, eyni zamanda, sosial təminatla əlaqədar DOST Mərkəzinin açılışını qeyd edə bilərəm. Onun yanında “ASAN xidmət” mərkəzi dayanır. O da vaxtilə mənim göstərişimlə yaradılmışdır ki, insanlara daha gözəl xidmət göstərilsin.
Yəni proqramın tərkib hissəsinə baxmaq kifayətdir ki, burada hər kəs görsün ki, Naxçıvanın inkişafı reallıqdır. Onu da əlavə edə bilərəm ki, bu yaxınlarda - bir neçə ay bundan əvvəl qəbul edilmiş kənd təsərrüfatının inkişafına dair Dövlət Proqramında da Naxçıvanın xüsusi yeri var, payı var, lazımi vəsait nəzərdə tutulub. O cümlədən kənd təsərrüfatının inkişafı üçün vacib olan amil – suvarma layihələri icra edilir. Bir çox artezian quyuları qazılacaq, müasir suvarma sistemləri quraşdırılacaq. Bu gün suvarılmayan torpaqlara su veriləcək. Beləliklə, muxtar respublikanın inkişafı daha sürətli və hərtərəfli olacaq.
Cənab İlham Əliyevin 11 avqust 2026-cı ildə Naxçıvana səfəri zamanı Azərbaycan Televiziyasına verdiyi müsahibəsində Naxçıvanın tarixi və mədəniyyəti, memarlıq mədəniyyəti və tarixi şəxsiyyətləri mövzusuna toxunaraq bildirmişdir ki, Naxçıvan çox zəngin tarixə və mədəniyyətə, o cümlədən memarlıq mədəniyyətinə malikdir. Digər vacib sahə Naxçıvanın tarixi-mədəni abidələrinin qorunmasıdır. Bildiyiniz kimi, Naxçıvan qədim Atabəylər dövlətinin paytaxtı olub və o dövrə, ondan sonrakı dövrə aid olan bir çox abidələr dünya əhəmiyyətli abidələrdir. Möminə xatun məqbərəsinin bərpası ilə bağlı görülən işlər bu gün mənə təqdim edildi. Eyni zamanda, digər tarixi-mədəni obyektlərin konservasiyası, qorunması və bərpası nəzərdə tutulur. Möminə xatun məqbərəsinin müəllifi məşhur naxçıvanlı memar Əcəmi Naxçıvaninin şərəfinə abidə ucaldıldı. O abidənin arxasında onun ölməz əsəri Möminə xatun məqbərəsi yerləşir. Bütün bu məsələlər böyük əhəmiyyət daşıyır. Çünki təbii ki, sosial-iqtisadi inkişaf, enerji təhlükəsizliyi vacib məsələlərdir. Ancaq bütün bu görülən işlərin təməlində bizim milli kimliyimiz dayanır, milli ruhumuz dayanır, mədəniyyətimiz, dilimiz, ədəbiyyatımız, tariximiz dayanır. Azərbaycan xalqı xoşbəxt xalqdır. Biz tariximizlə, mədəniyyətimizlə, görkəmli şəxsiyyətlərimizlə fəxr edə bilərik. Naxçıvan, eyni zamanda, Azərbaycana bir çox görkəmli şəxsiyyətlər bəxş edib. Yəni bu bölgənin zəngin tarixi, bu bölgədə yaşayan insanların mərdliyi, doğma Vətənə bağlılığı və eyni zamanda, Naxçıvanın strateji yerləşməsi və imkanları, burada icra olunan və olunacaq layihələr bu gün təkcə Azərbaycan üçün deyil, – halbuki birinci növbədə Azərbaycan üçün, – geniş coğrafiya üçün böyük əhəmiyyət kəsb edir.
Məsələn, əgər biz nəqliyyat dəhlizlərindən danışırıqsa, bu gün təbii ki, Naxçıvanın timsalında yeni nəqliyyat damarlarını görürük. Biz bunu yaradırıq. Bunu yaratmaq üçün bir çox işlər görülüb və görüləcək. Ona görə bu məsələlərə daim diqqət göstərilir və göstəriləcək.
Naxçıvana səfəri zamanı Azərbaycan Televiziyasına verdiyi müsahibəsində ölkə başçısı cənab İlham Əliyev Zəngəzur dəhlizinin yaradılmasından söz açaraq qeyd etmişdir ki, Zəngəzur dəhlizinin yaradılması bizim təşəbbüsümüz olub. Azərbaycanın əsas hissəsini onun ayrılmaz hissəsi olan Naxçıvanla birləşdirmək bizim çoxdankı arzumuz olub. Biz bu hədəfə doğru inamla və çox böyük məharətlə addımlayırdıq, yaxınlaşırdıq və artıq yaxınlaşmışıq. Təbii ki, yadınızdadır, İkinci Qarabağ müharibəsinin başa çatması ilə əlaqədar üçtərəfli bəyanat imzalanmışdır - Azərbaycan Prezidenti, Rusiya Prezidenti və Ermənistanın Baş naziri. Əslində, bu, Ermənistan üçün kapitulyasiya aktı idi, çünki Ermənistan təslim oldu. O vaxt hələ işğal altında olan, - müharibə yolu ilə hələ biz o bölgələri azad etməmişdik, – Ağdam, Kəlbəcər və Laçın rayonları bir güllə atılmadan bizə qaytarıldı. Təbii ki, Ermənistan bunu könüllü etməmişdir, biz onu məcbur etdik. Kimisə müharibə şəraitində məcbur edirsənsə, deməli, həmin o tərəf kapitulyasiyaya uğrayır. Yəni bu termində hər hansı bir alçaldıcı, yaxud da ki, təhqiramiz bir məna axtarmaq lazım deyil. Bu, sadəcə olaraq, reallıqdır. İkinci Qarabağ müharibəsindən keçən 5 il ərzində Zəngəzur dəhlizinin açılması ilə bağlı Ermənistan tərəfindən heç bir praktiki addım atılmamışdır. Dəfələrlə biz bu məsələni həm Rusiyaya, həm Ermənistana çatdırırdıq ki, vaxt gedir, bu bəyanat, onun vacib hissəsi icra edilmir və bu, dözülməz haldır. Müxtəlif vaxtlarda müxtəlif cavablar alırdıq, bu barədə çox danışmaq istəmirəm. Fakt odur ki, Ermənistan bunu hər cür uzatmağa çalışırdı. Rusiya tərəfi isə ya bunu təmin edə bilmirdi, ya da ki, hansısa başqa səbəblər var idi. Yəni fakt o idi ki, keçən ilin avqust ayına qədər məsələ dondurulmuş vəziyyətdə idi. Amerika Birləşmiş Ştatlarında bu məsələyə yaxınlaşmağa başlayanda, - təqribən keçən ilin yaz aylarından, yazın əvvəlində başlanmış təmaslar nəticəsində artıq bu prosesə start verilmişdir, - təbii ki, Ermənistan-Azərbaycan normallaşma prosesinə öz töhfələrini verməyə çalışırdılar, buna hazır olduqlarını bildirirdilər. Təbii ki, bizim bir neçə önəmli şərtimiz var idi, o cümlədən Zəngəzur dəhlizi. Nəticə etibarilə 2025-ci il avqustun 8-də tarixi Vaşinqton Zirvə Görüşündə bu məsələ öz həllini tapdı. TRIPP adını daşıyan bu layihənin icrasına artıq start verilmişdir. Bu yaxınlarda, üç gün bundan qabaq - avqustun 8-də Prezident Trampla söhbət əsnasında bu məsələyə də toxunuldu və hər iki tərəf əminliyini vurğuladı ki, bu önəmli nəqliyyat layihəsi mütləq və tezliklə icra ediləcək. Yəni bu, məsələnin tarixçəsidir.
Məhz Zəngəzur dəhlizindən Naxçıvana girərək və Culfa dəmiryol məntəqəsindən İrana dəmir yolu var. Yəni bu layihə daha tez reallaşa bilər. Şimal-Cənub nəqliyyat dəhlizi Fars körfəzinə istiqamətləndirilir. Oradan o bölgəyə yaxın olan, məsələn, Pakistana uzana bilər. Yəni bu, çox önəmli bir nəqliyyat layihəsi olacaqdır və bunun mərkəzində Naxçıvan dayanır. Ona görə bu gün strateji nöqteyi-nəzərindən, bundan əvvəl dediyim amillərlə yanaşı, bu amil də çox önəmli rol oynayır. Əlbəttə ki, buradan keçən tutaq ki, 15 milyon ton, bəlkə daha çox yük daha böyük canlanmaya gətirib çıxaracaq. Daha çox iş yerləri açılacaq, iqtisadi fəallıq artacaq və Naxçıvan deyə bilərəm ki, əvəzolunmaz nəqliyyat mərkəzlərinin birinə çevriləcəkdir. Bu, tam mümkündür. Hamımız yaxşı bilirik, dəfələrlə bu barədə danışmışıq, ölkəmizin açıq dənizlərə çıxışı yoxdur, okeanlara çıxışı yoxdur. Amma bu gün Avrasiya nəqliyyat dəhlizlərinin icrası məsələləri müzakirə olunanda bizi “bypass” etmək, bizdən yan keçmək mümkün deyil. Bax, Naxçıvanın da eyni gələcəyi olacaqdır və əlbəttə ki, bu bizə həm iqtisadi, həm başqa dividendlər gətirəcək.

İman Məmmədov

13/08/2026

Naxçıvanın inkişafında yeni strateji mərhələ
Naxçıvana hər səfər Azərbaycanın dövlətçilik tarixində xüsusi əhəmiyyət daşıyan bu qədim diyarın gələcəyinə dair yeni baxışların ifadəsi ilə yadda qalır. Prezident İlham Əliyevin 11 avqust 2026-cı ildə Naxçıvana səfəri də regionun sosial-iqtisadi inkişafı, nəqliyyat imkanlarının genişləndirilməsi və qarşıda duran strateji hədəflər baxımından mühüm mesajlarla zəngin oldu. Dövlət başçısının Azərbaycan Televiziyasına müsahibəsində səsləndirdiyi fikirlər Naxçıvanın ölkənin ümumi inkişaf strategiyasında artan rolunu və qarşıdakı mərhələdə bu diyar üçün yeni imkanların formalaşdığını bir daha göstərdi.
Dövlət başçısının vurğuladığı kimi, Naxçıvanın əhəmiyyəti onun zəngin tarixi və burada yaşayan insanların Vətənə bağlılığı ilə məhdudlaşmır. Muxtar respublikanın coğrafi mövqeyi də ona xüsusi strateji əhəmiyyət qazandırır. Naxçıvan Azərbaycan ərazisinin mühüm hissəsi olmaqla yanaşı, regionun nəqliyyat və iqtisadi əlaqələrinin inkişafında mühüm rol oynaya biləcək imkanlara malikdir.
Müsahibədə diqqət çəkən əsas məsələlərdən biri Naxçıvanın yeni nəqliyyat dəhlizlərinin formalaşmasında oynayacağı roldur. Prezidentin sözləri ilə desək, bu gün Naxçıvanın timsalında “yeni nəqliyyat damarları” yaradılır. Bu ifadə bölgənin gələcək inkişaf istiqamətlərini aydın şəkildə xarakterizə edir. Nəqliyyat infrastrukturunun genişləndirilməsi Naxçıvanın Azərbaycanın digər bölgələri ilə əlaqələrinin möhkəmlənməsinə, həmçinin region ölkələri arasında iqtisadi və logistika əlaqələrinin inkişafına mühüm töhfə verə bilər.
Naxçıvanın tranzit imkanlarının artırılması yalnız nəqliyyat sektorunun inkişafı demək deyil. Yeni yolların və dəhlizlərin yaradılması bölgəyə investisiyaların cəlb olunmasına, sahibkarlığın genişlənməsinə, yeni iş yerlərinin açılmasına və iqtisadi fəallığın artmasına şərait yarada bilər. Bu baxımdan Naxçıvanda həyata keçirilən və gələcəkdə reallaşdırılması nəzərdə tutulan layihələr həm Azərbaycan, həm də daha geniş coğrafiya üçün əhəmiyyət daşıyır.
Səfər çərçivəsində Naxçıvan şəhərinin 2044-cü ilədək inkişafına dair Baş Planla tanışlıq da gələcəyə hesablanmış böyük məqsədlərin göstəricisidir. Şəhərin müasir şəhərsalma prinsipləri əsasında inkişaf etdirilməsi, yeni yaşayış massivlərinin salınması, sosial infrastrukturun genişləndirilməsi və insanların rahatlığının təmin edilməsi qarşıdakı illərdə əsas prioritetlərdən olacaq. Eyni zamanda sosial evlər kompleksinin təməlinin qoyulması dövlət siyasətinin mərkəzində insan amilinin dayandığını bir daha nümayiş etdirir.
Prezident İlham Əliyevin müsahibəsində səsləndirdiyi fikirlərdən aydın olur ki, Naxçıvanın inkişafı dövlət siyasətinin diqqət mərkəzində olan istiqamətlərdən biridir. Bu diqqət bölgənin tarixi-mədəni irsinin qorunması ilə yanaşı, onun müasir infrastruktur və iqtisadi imkanlarının daha da gücləndirilməsini də əhatə edir.
Naxçıvan bu gün yalnız Azərbaycanın qədim tarixini özündə yaşadan bir diyar deyil, həm də ölkənin gələcək inkişafında mühüm strateji rol oynayacaq bölgələrdən biridir. Ulu Öndər Heydər Əliyevin doğma yurdu olan Naxçıvanın yeni nəqliyyat və iqtisadi imkanlarının formalaşması onun regional əhəmiyyətini daha da artırır. Qarşıdakı illərdə həyata keçiriləcək layihələr Naxçıvanı Azərbaycanın əsas nəqliyyat, iqtisadi və strateji mərkəzlərindən birinə çevirmək üçün mühüm zəmin yarada bilər.
Aidə Həsənova

13/08/2026

Naxçıvanın strateji və iqtisadi əhəmiyyəti

Azərbaycan Respublikasının Prezidenti İlham Əliyevin 11 avqust 2026-cı ildə Naxçıvan Muxtar Respublikasına səfəri çərçivəsində Azərbaycan Televiziyasına verdiyi müsahibə ölkənin qarşıdakı inkişaf perspektivlərinin və yeni regional reallıqların dəyərləndirilməsi baxımından mühüm siyasi hadisədir.
Dövlət başçısının Naxçıvana 17-ci səfəri bu diyarın Azərbaycanın dövlət siyasətində xüsusi yer tutduğunu bir daha göstərir. Son illərdə Naxçıvanda təhlükəsizlikdən infrastruktura, enerjidən sənayeyə, kənd təsərrüfatından turizmə qədər çoxsaylı istiqamətlər üzrə genişmiqyaslı işlər görülüb. Lakin hazırkı mərhələnin əsas fərqi ondan ibarətdir ki, qarşıya qoyulan məqsədlər Naxçıvanın mövcud imkanlarını qorumaqla kifayətlənmir, onun yeni regional iqtisadi və nəqliyyat sistemində aparıcı mövqeyə çıxarılmasını nəzərdə tutur.
Bununla yanaşı, səfərin ümumi məzmunu göstərdi ki, mövcud mərhələdə əsas diqqət Naxçıvanın iqtisadi potensialının genişləndirilməsinə, məşğulluğun artırılmasına, yeni istehsal sahələrinin yaradılmasına və muxtar respublikanın regional iqtisadi proseslərə daha fəal inteqrasiyasına yönəldilir.
Bu baxımdan ən mühüm layihələrdən biri Naxçıvan Sənaye Parkının yaradılmasıdır. Avqustun 11-də Prezident İlham Əliyevin və birinci xanım Mehriban Əliyevanın iştirakı ilə parkın təməli qoyuldu. 310 hektar ərazini əhatə edəcək Sənaye Parkında elektrik və istilik enerjisi, qaz, su, rabitə, nəqliyyat və digər zəruri infrastrukturun yaradılması nəzərdə tutulur. Sənaye Parkının əhəmiyyəti yalnız yeni istehsal müəssisələrinin yaradılması ilə məhdudlaşmır. Prezidentin müsahibəsində vurğulandığı kimi, qarşıya qoyulan əsas məqsədlərdən biri məşğulluğun artırılması və Naxçıvan iqtisadiyyatında istehsal sektorunun payının genişləndirilməsidir. Bu yanaşma gələcəkdə muxtar respublikanın iqtisadi fəallığının yalnız dövlət investisiyaları hesabına deyil, yerli və xarici özəl sərmayələrin cəlb olunması yolu ilə də artırılması üçün yeni imkanlar yaradır.
Azərbaycan Televiziyasına müsahibənin mühüm hissəsi Naxçıvan dəmir yolunun yenidən qurulması və Zəngəzur dəhlizi ilə bağlı perspektivlərə həsr olundu. Yeni texniki-iqtisadi əsaslandırmaya uyğun olaraq Naxçıvan dəmir yolunun uzunluğu 194 kilometrdən çox olacaq, xəttin illik yükaşırma qabiliyyətinin isə 15 milyon tona çatdırılması nəzərdə tutulur. Bu rəqəmlər layihənin yalnız daxili nəqliyyat infrastrukturu kimi deyil, beynəlxalq yükdaşımalar sisteminin mühüm elementi kimi nəzərdə tutulduğunu göstərir. Dövlət başçısı yeni nəqliyyat xəttinin həm Şərq–Qərb, həm də Şimal–Cənub nəqliyyat marşrutları baxımından əhəmiyyətinə diqqət çəkdi. Naxçıvanın Culfa vasitəsilə İran istiqamətinə çıxış imkanları da nəzərə alındıqda muxtar respublikanın gələcəkdə bir neçə beynəlxalq nəqliyyat xəttinin kəsişmə nöqtəsinə çevrilməsi üçün ciddi perspektivlər yaranır. Prezidentin Naxçıvanın gələcəkdə “əvəzolunmaz nəqliyyat mərkəzlərinin birinə” çevrilə biləcəyini vurğulaması da məhz bu strateji yanaşmanı ifadə edir. Müsahibədə Avropa İttifaqı nümayəndələrinin Naxçıvan dəmir yolu layihəsinə maraq göstərdiyi də bildirildi. Prezident Naxçıvan seqmentinin reabilitasiyası zamanı nəzarət paketinin Azərbaycan dövlətinə məxsus olması şərti ilə beynəlxalq konsorsium modelinin mümkünlüyünü qeyd etdi. Bu yanaşma Naxçıvana artıq coğrafi baxımdan bloklanmış ərazi kimi deyil, gələcək regional və beynəlxalq bağlantıların mühüm qovşaqlarından biri kimi baxıldığını göstərir.
Prezidentin səfəri yalnız iri geosiyasi və iqtisadi layihələrlə məhdudlaşmadı. Dövlət başçısı və birinci xanım Mehriban Əliyeva “Naxçıvan şəhərinin 2044-cü ilədək inkişafına dair Baş Plan” ilə də tanış oldular. Baş Plan Naxçıvan şəhərinin uzunmüddətli inkişafının sistemli şəkildə təşkil edilməsini, şəhər mərkəzinin yenilənməsini, yaşıllıq sahələrinin genişləndirilməsini, dayanıqlı nəqliyyat sisteminin qurulmasını, sosial infrastrukturun inkişafını və turizm imkanlarının artırılmasını nəzərdə tutur. Plana əsasən, şəhərdə adambaşına düşən yaşıllıq sahəsinin 15 kvadratmetrdən 27 kvadratmetrə çatdırılması, eyni zamanda 122 kilometrlik velosiped infrastrukturunun yaradılması planlaşdırılır. Bu göstəricilər şəhərsalma siyasətində yalnız tikinti həcminin deyil, yaşayış keyfiyyətinin, ekoloji dayanıqlılığın və ictimai məkanların inkişafının da əsas meyarlardan birinə çevrildiyini göstərir.
Prezidentin müsahibəsində diqqət çəkən digər mühüm məqam tarixi-mədəni irsin iqtisadi inkişaf prosesindən ayrı nəzərdən keçirilməməsi oldu. Səfər zamanı Möminə xatun türbəsində aparılan bərpa-konservasiya işləri ilə tanışlıq oldu, “Əcəmi seyrangahı”nda görkəmli Azərbaycan memarı Əcəmi Naxçıvaninin abidəsi açıldı. Prezident İlham Əliyevin milli kimlik, tarix və mədəniyyətin həyata keçirilən inkişaf siyasətinin təməlində dayanması ilə bağlı mesajları göstərir ki, Naxçıvanda modernləşmə tarixi simanın qorunması ilə paralel həyata keçiriləcək. Bu yanaşmanın digər istiqaməti isə tarixi-mədəni potensialın turizmin inkişafına xidmət edən iqtisadi resursa çevrilməsidir.
11 avqust səfərinin və Prezident İlham Əliyevin Azərbaycan Televiziyasına müsahibəsinin ümumi məzmunu göstərir ki, Naxçıvanın inkişafında yeni mərhələnin başlıca məqsədi muxtar respublikanın daxili iqtisadi potensialını geniş regional və beynəlxalq proseslərlə birləşdirməkdir. Prezidentin təqdim etdiyi strateji baxışda Naxçıvanın, Qarabağın və Şərqi Zəngəzurun vahid inkişaf məntiqi çərçivəsində formalaşdırılması xüsusi yer tutur. Bu yanaşma ölkənin müxtəlif iqtisadi regionları arasında yeni nəqliyyat, enerji və istehsal əlaqələrinin qurulmasına, iqtisadi fəallığın daha geniş coğrafiyada təmin olunmasına xidmət edir.
Çinarə Rüstəmova

12/08/2026

Naxçıvana dövlət qayğısı: yeni hədəflər, yeni perspektivlər
Naxçıvan əsrlər boyu özünün zəngin mədəniyyəti, yenilməz ruhu, sarsılmaz dövlətçilik ənənələri və coğrafi mövqeyi ilə seçilməklə yanaşı, eyni zamanda Azərbaycan xalqının taleyini köklü şəkildə dəyişən, xalqın mövcudluq mübarizəsinə yön verən dahi şəxsiyyətlər yetişdirmişdir. Bu tarixi şəxsiyyətlər arasında xalqımızın xilaskarlıq missiyasını öz üzərinə götürən, Azərbaycan dövlətinin banisi və memarı, Ulu Öndər Heydər Əliyevin adı tariximizə və milli şüurumuza qızıl hərflərlə həkk olunmuşdur. Prezident İlham Əliyevin Naxçıvana növbəti səfəri və səfər çərçivəsində Azərbaycan Televiziyasına verdiyi geniş, hərtərəfli və məzmunlu müsahibə də məhz bu tarixi həqiqətin, eləcə də Naxçıvanın dünəni, bu günü və gələcəyinə dair strateji hədəflərin dərindən təhlili baxımından böyük ictimai-siyasi və dövlətçilik əhəmiyyəti kəsb edir.
Prezident İlham Əliyevin Naxçıvana səfərləri də bu siyasətin mühüm göstəricilərindəndir. Dövlət başçısının regionun müxtəlif sahələrinə dair verdiyi tapşırıqlar, həyata keçirilən layihələrlə yerində tanış olması və qarşıda duran vəzifələri müəyyənləşdirməsi Naxçıvanın inkişafının dövlət siyasətində xüsusi əhəmiyyət daşıdığını göstərir.
Prezident İlham Əliyevin siyasətində regionların sosial-iqtisadi inkişafı xüsusi yer tutur. Bu siyasətin əsas məqsədlərindən biri paytaxtla yanaşı, Azərbaycanın bütün bölgələrinin hərtərəfli inkişafını təmin etməkdir. Naxçıvan da bu strategiyanın mühüm istiqamətlərindən biridir. Son illərdə muxtar respublikada həyata keçirilən layihələr insanların gündəlik həyat şəraitinin yaxşılaşdırılmasına, yeni iş yerlərinin yaradılmasına və iqtisadi fəallığın artırılmasına xidmət edir.
Naxçıvanın iqtisadi potensialının gücləndirilməsi də xüsusi diqqət mərkəzindədir. Sənaye, kənd təsərrüfatı, turizm, nəqliyyat və digər sahələrin inkişafı üçün geniş imkanlar mövcuddur. Prezidentin tapşırıq və göstərişləri əsasında bu imkanlardan səmərəli istifadə edilməsi, yerli istehsalın artırılması və sahibkarlığın inkişaf etdirilməsi istiqamətində tədbirlər görülür. Bu proses Naxçıvanın ölkə iqtisadiyyatına daha fəal inteqrasiyasına şərait yaradır.
Naxçıvanın nəqliyyat və logistika imkanlarının genişləndirilməsi də mühüm məsələlərdən biridir. Muxtar respublikanın Azərbaycanla daha sıx nəqliyyat əlaqələrinin təmin olunması, regionda yeni kommunikasiya imkanlarının yaradılması həm Naxçıvanın, həm də bütövlükdə Azərbaycanın iqtisadi və strateji mövqeyini gücləndirir. Azərbaycanın regional nəqliyyat layihələrində fəal iştirakı Naxçıvanın gələcəkdə mühüm nəqliyyat qovşaqlarından birinə çevrilməsi üçün yeni imkanlar yaradır.
Prezident İlham Əliyevin Naxçıvana səfərinin digər mühüm tərəfi əhali ilə görüşlər və onların qayğılarının diqqətdə saxlanılmasıdır. Dövlət siyasətinin əsas istiqamətlərindən biri vətəndaş məmnunluğunun təmin olunmasıdır. Naxçıvan sakinlərinin sosial rifahının yaxşılaşdırılması, məşğulluğun artırılması, müasir xidmətlərə çıxış imkanlarının genişləndirilməsi istiqamətində görülən işlər bu məqsədə xidmət edir.
Naxçıvan həm də Azərbaycan dövlətçiliyi və milli-mənəvi dəyərləri baxımından xüsusi əhəmiyyətə malikdir. Bu qədim diyar Azərbaycanın tarixində mühüm izlər qoymuş böyük şəxsiyyətlərin vətənidir. Naxçıvanın tarixi-mədəni irsinin qorunması, abidələrin bərpası və gələcək nəsillərə çatdırılması dövlət siyasətinin mühüm istiqamətlərindəndir. Prezident İlham Əliyevin Naxçıvana səfərləri zamanı mədəni irsə göstərilən diqqət də bunun bariz nümunəsidir.
Naxçıvanın inkişafı Azərbaycanın ümumi inkişaf strategiyasının tərkib hissəsidir. Dövlət başçısının rəhbərliyi ilə həyata keçirilən layihələr muxtar respublikanın sosial-iqtisadi imkanlarının artırılmasına, müasir şəhər və kənd infrastrukturunun formalaşdırılmasına və insanların həyat səviyyəsinin yüksəldilməsinə yönəlib. Bu baxımdan Prezidentin Naxçıvana 17-ci səfəri də dövlətin bu bölgəyə xüsusi diqqətinin göstəricisi kimi qiymətləndirilə bilər.
Prezident İlham Əliyevin bu tarixi səfəri və verdiyi proqram xarakterli bəyanatlar bir daha parlaq şəkildə nümayış etdirdi ki, Naxçıvan həm Ulu Öndər Heydər Əliyev irsinin ehtiramla və paklıqla qorunub saxlanıldığı müqəddəs bir ocaq, həm də müasir Azərbaycanın dinamik inkişaf edən, strateji baxımdan günbəgün güclənən mühüm qalasıdır. Tarixin ən mürəkkəb, sınaqlı və taleyüklü anlarında Azərbaycan xalqına Heydər Əliyev kimi dahi lider, xilaskar dövlət xadimi bəxş edən bu mübarək torpaq, bu gün də müstəqil Azərbaycan Respublikasının qüdrətlənməsi, sabitliyi, ərazi bütövlüyünün sarsılmazlığı və parlaq gələcəyi yolunda öz tarixi və şərəfli missiyasını böyük qürurla, inamla sürdürür.
Allahverdiyeva Şəhla

12/08/2026

Yeni Dövrün Naxçıvanı: Güclü Ordu, Yaşıl Enerji və Strateji Hədəflər
2026-cı il avqustun 11-də Prezident İlham Əliyevin Naxçıvan Muxtar Respublikasına səfəri və səfər çərçivəsində Azərbaycan Televiziyasına verdiyi geniş müsahibə Naxçıvanın gələcək inkişaf perspektivlərinin müəyyənləşdirilməsi baxımından mühüm siyasi və strateji əhəmiyyət daşıyır. Dövlət başçısının müsahibəsində səsləndirdiyi fikirlər göstərir ki, Naxçıvanın inkişafı yalnız muxtar respublikanın sosial-iqtisadi tərəqqisi ilə məhdudlaşmır. Qarşıya qoyulan hədəflər Naxçıvanı təhlükəsizlik, enerji, nəqliyyat, sənaye, kənd təsərrüfatı, turizm və mədəniyyət baxımından regionun mühüm mərkəzlərindən birinə çevirməyə hesablanıb.
Naxçıvanın inkişafı Azərbaycan dövlətinin regional inkişaf siyasətində xüsusi yer tutur. Prezident İlham Əliyevin müsahibəsində də vurğulandığı kimi, son illər ərzində burada çoxsaylı mühüm layihələr həyata keçirilib. İndi isə əsas məqsəd əldə olunmuş nəticələri daha da genişləndirmək, sosial-iqtisadi inkişafı sürətləndirmək və əhalinin rifahını yüksəltməkdir.
Qlobal miqyasda enerji böhranlarının və risklərin artdığı indiki dövrdə Naxçıvan artıq uzun illərdir ki, 100 faizlik qazlaşdırma səviyyəsinə çatıb. İndi isə hədəf daha böyükdür: muxtar respublika Qarabağ və Şərqi Zəngəzur kimi əsl yaşıl enerji zonasına çevrilir. Yeni təməli qoyulan 300 meqavatlıq istilik elektrik stansiyası və böyük potensiala malik Günəş elektrik stansiyaları Naxçıvanı nəinki daxili enerji tələbatı baxımından tam sığortalayacaq, həm də onu Türkiyə və Avropa bazarlarına elektrik enerjisi ixrac edən mərkəzə çevirəcək. Digər tərəfdən, yeni yaradılan və ərazisinə görə ölkədə Sumqayıtdan sonra ikinci olan Naxçıvan Sənaye Parkı yeni iş yerlərinin açılmasına, iqtisadiyyatın canlanmasına və yerli istehsalın sıçrayışına böyük təkan verəcək.
Bütün bu inkişaf fonunda ən mühüm və strateji məsələlərdən biri Naxçıvanı Azərbaycanın əsas hissəsi ilə birləşdirəcək Zəngəzur dəhlizidir. Ermənistanın illərlə prosesi dondurmaq və uzatmaq cəhdlərinə baxmayaraq, xüsusilə son aylar beynəlxalq təmaslar nəticəsində TRIPP layihəsinə artıq start verilib. Horadiz–Ağbənd avtomobil yolunun demək olar ki, hazır olması və dəmir yolunun inşasının sürətləndirilməsi göstərir ki, Azərbaycan bu tarixi layihəni qısa zamanda, lazım gələrsə öz vəsaiti hesabına reallaşdırmaq əzmindədir. Dəhlizin açılması Naxçıvanı həm Şərq-Qərb, həm də Şimal-Cənub qlobal nəqliyyat marşrutlarının kəsişdiyi əvəzolunmaz tranzit qovşağına çevirəcək. Eyni zamanda, bu marşrut boyunca çəkiləcək elektrik və fiber-optik xətlər bölgənin əhəmiyyətini daha da artıraraq qonşu ölkələr üçün də yeni imkanlar yaradacaq.
İqtisadiyyat və nəqliyyatla yanaşı, idarəetmə və sosial sahələrdə də köklü dəyişikliklər baş verir. Qarabağ və Şərqi Zəngəzurda uğurla sınaqdan çıxarılmış idarəetmə modelinin – Prezidentin xüsusi nümayəndəliyi institutunun Naxçıvanda da fəaliyyətə başlaması regionun vahid konsepsiya əsasında inkişafına yol açıb. Artıq DOST və "ASAN xidmət" mərkəzləri əhalinin xidmətindədir, şəhər daxilində köhnə ictimai nəqliyyat ekoloji təmiz elektrik avtobusları ilə əvəzlənib və zəngin turizm potensialını dəyərləndirmək üçün müasir beşulduzlu otelin inşasına başlanılıb. Dövlət büdcəsinin birbaşa dəstəyi ilə həyata keçirilən kənd təsərrüfatı proqramları, yeni suvarma sistemlərinin qurulması, yüzlərlə kilometr kənd yollarının yenidən çəkilməsi onu göstərir ki, Naxçıvan, Qarabağ və Şərqi Zəngəzur iqtisadi və sosial baxımdan bir-birini tamamlayan, nümunəvi bir inkişaf məkanı kimi tamamilə yeni dövrə qədəm qoyur.
Cəmalə Əliyeva

Zəngilan rayon 4 Nömrəli tam orta məktəb

14/08/2026

14/08/2026

13/08/2026

13/08/2026

12/08/2026

12/08/2026

Address

Telephone

Website

Alerts

Contact The School

Shortcuts

Share

Category

Listing takedown request