257 nömrəli tam orta məktəb

23 iyun – Dövlət Qulluqçularının Peşə Bayramı Günü münasibətilə ölkəmizin inkişafına, vətəndaşlara keyfiyyətli xidmətin göstərilməsinə, eləcə də elm və təhsil sahəsində həyata keçirilən islahatların uğurla davam etdirilməsinə töhfə verən dövlət qulluqçularını təbrik edir, onlara məsul və şərəfli fəaliyyətlərində yeni uğurlar arzulayırıq!

“Müəllimlərlə növbəti metodik görüş keçirildi” 📚

18.06.2026-cı il tarixində məktəbimizdə metodist Şənay Muxtarova tərəfindən müəllimlərlə növbəti metodik görüş keçirilmişdir.
Görüş zamanı Azərbaycan dili, Riyaziyyat və Təbiət fənlərini tədris edən müəllimlərlə dərs icmallarının Azərbaycan Respublikasının Təhsil İnstitutunun (ARTİ) müəyyən etdiyi tələblərə uyğun hazırlanması, təlim nəticələrinin düzgün müəyyənləşdirilməsi, təlim fəaliyyətlərinin məqsədyönlü planlaşdırılması və uyğun qiymətləndirmə meyarlarının seçilməsi məsələləri müzakirə edilmişdir.
Metodik görüş çərçivəsində müəllimlər tərəfindən hazırlanmış dərs icmalları təhlil olunmuş, onların məzmunu və strukturu ilə bağlı fikir mübadiləsi aparılmışdır. İcmalların təkmilləşdirilməsi məqsədilə müəllimlərə müvafiq metodik tövsiyələr verilmiş, aşkar olunmuş çatışmazlıqların aradan qaldırılması istiqamətində təkliflər səsləndirilmişdir.
Görüşün əsas məqsədi tədrisin keyfiyyətinin yüksəldilməsi, müəllimlərin peşəkar inkişafının dəstəklənməsi və təlim prosesinin səmərəli təşkilinə metodik dəstəyin göstərilməsi olmuşdur.

“Dərsdə diferensial yanaşmanın tətbiqi” mövzusunda metodik görüş 📚

16.06.2026-cı il tarixində məktəbimizdə “Dərsdə diferensial yanaşmanın tətbiqi” mövzusunda metodik görüş keçirildi.
Görüşün əsas məqsədi müəllimlərin diferensial təlim sahəsində bilik və bacarıqlarını inkişaf etdirmək, şagirdlərin fərdi xüsusiyyət və öyrənmə ehtiyaclarını nəzərə alan təlim strategiyalarının tətbiqinə dəstək vermək olmuşdur.
Görüş zamanı diferensial təlimin mahiyyəti, əsas istiqamətləri və dərs prosesində səmərəli tətbiq yolları ətrafında fikir mübadiləsi aparılmış, müəllimlər tərəfindən praktik təcrübələr paylaşılmışdır.
Metodik görüş müəllimlərin təcrübə mübadiləsinə, təlim prosesinin daha effektiv təşkilinə və şagirdyönümlü yanaşmaların inkişafına xidmət etmişdir.

Milli iradənin zəfərini təcəssüm etdirən Milli Qurtuluş Günü münasibətilə Azərbaycan xalqını təbrik edirik.

“Məktəbimizin şəhid məzunları yad edildi” 🇦🇿🌹

13.06.2026-cı il tarixində keçirilən “Son zəng” tədbiri çərçivəsində məktəbimizin Vətən uğrunda canlarından keçmiş şəhid məzunlarının əziz xatirəsi ehtiramla yad edildi.
Tədbir iştirakçıları şəhid məzunlarımızın büstü önünə gül dəstələri qoyaraq onların əziz xatirəsini yad etdilər. Qəhrəman məzunlarımızın göstərdikləri igidlik və şücaət gənc nəslə örnək kimi təqdim olundu.
Şəhidlərimizin əziz xatirəsi hər zaman qəlbimizdə yaşayacaq, onların Vətən naminə göstərdikləri fədakarlıq heç zaman unudulmayacaq!
Allah bütün şəhidlərimizə rəhmət etsin!

“Son Zəng” tədbiri keçirildi ✨🎈

13.06.2026-cı il tarixində məktəbimizdə məzunlarımız üçün “Son Zəng” tədbiri keçirildi.
Tədbir Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad olunması ilə başladı.
Daha sonra məktəbin direktoru Ruslan Nağıyev çıxış edərək məzunları təbrik etdi, onlara gələcək həyat yollarında uğurlar arzuladı. Tədbirdə iştirak edən şəhid ailələri və İcra Hakimiyyətinin nümayəndəsi də çıxış edərək məzunlara öz xoş arzularını çatdırdılar.
Tədbirin bədii hissəsində I sinif şagirdlərimiz vətənpərvərlik və məktəb mövzusunda şeirlər söylədilər. XI sinif şagirdləri isə maraqlı çıxışlar, musiqi nömrələri və rəqslərlə yaddaqalan anlar yaşatdılar.
Daha sonra XI sinif şagirdi bilik açarını X sinif şagirdinə təqdim etdi. Bu simvolik ənənə məktəbin elm və bilik yolunun gələcək nəsillərə ötürülməsini ifadə etdi.
Tədbirin sonunda I sinif şagirdimiz Son Zəngi səsləndirdi. Məzunlar üçün məktəb illərinin başa çatdığını bildirən zəng hər kəsdə kövrək və unudulmaz duyğular oyatdı.
Bütün məzunlarımızı təbrik edir, onlara gələcək həyatlarında uğurlar, yeni nailiyyətlər və parlaq gələcək arzulayırıq! 🎓✨

“Beynəlxalq Spirit of Math Riyaziyyat Müsabiqəsində şagirdimizin uğuru” ✨

Məktəbimizin 2 “A” sinif şagirdi Yolçuyev Əliyar Beynəlxalq Spirit of Math Riyaziyyat Müsabiqəsinin milli mərhələsində uğurla iştirak edərək bürünc mükafata layiq görülmüşdür.
Şagirdimizi təbrik edir, ona gələcək təhsil həyatında daha böyük nailiyyətlər arzulayırıq! 📚

“Qlobal Riyaziyyat Olimpiadasında şagirdlərimizin uğurları” 📐 🔢

Beyin Olimpiada Mərkəzinin təşkil etdiyi Qlobal Riyaziyyat Olimpiadasında məktəbimizin 4 “Ç” sinif şagirdlərindən Oruclu Emil göstərdiyi yüksək nəticəyə görə qızıl medal, Hacıyev Səid isə gümüş medal qazanıb.
Şagirdlərimizi təbrik edir, onlara gələcək yarışlarda daha böyük uğurlar arzulayırıq. Uğurlarınız daim olsun! 🌟

“IX sinif şagirdləri üçün peşəyönümü ekskursiya təşkil edildi”

Məktəb rəhbərliyinin təşkilatçılığı ilə IX sinif şagirdləri üçün Turizm və Sosial Xidmətlər üzrə Bakı Dövlət Peşə Təhsil Mərkəzinə ekskursiya təşkil edildi.
Ekskursiyanın əsas məqsədi şagirdləri peşəyönümü istiqamətində maarifləndirmək, müxtəlif ixtisas sahələri ilə tanış etmək və onların gələcək peşə seçimlərinə dəstək göstərmək idi.
Ekskursiya zamanı şagirdlər turizm, hotelçilik, aşpazlıq, xidmət sahələri və digər ixtisaslar haqqında ətraflı məlumat əldə etdilər. Mərkəzin müəllim və əməkdaşları tərəfindən tədris prosesi, praktik məşğələlər və peşə təhsilinin üstünlükləri barədə təqdimatlar keçirildi.
Şagirdlər emalatxana və tədris otaqlarında yaradılmış şəraitlə tanış oldu, peşə bacarıqlarının formalaşdırılması istiqamətində həyata keçirilən fəaliyyətləri maraqla izlədilər. Onlara əmək bazarında tələb olunan peşələr və həmin sahələrdə gələcək inkişaf imkanları barədə də məlumat verildi.

“Atletika üzrə məktəbdaxili yarışlar keçirildi”

Məktəbin tədbirlər planına uyğun olaraq “İdman aylığı (may-iyun)” çərçivəsində atletika yarışları keçirildi.Yarışlarda müxtəlif siniflərdən ibarət şagirdlər iştirak etdilər.
Şagirdlər oyunlar zamanı yüksək qətiyyət nümayiş etdirərək əzmkar şəkildə mübarizə apardılar. Yarışlar ədalətli hakimlik prinsipləri əsasında keçirildi. Oyunlar zamanı şagirdlərdə sürət, sürət-güc,çeviklik hərəki qabiliyyətlərinin xüsusiyyətləri inkişaf etdirildi.
Sonda qalib şagirdlər müəyyən olunaraq məktəb rəhbərliyi tərəfindən təltif edildilər. Bu cür tədbirlərin keçirilməsi şagirdlərin psixoloji inkişafına və məktəbdə idman mühitinin daha da gücləndirilməsinə müsbət təsir göstərir.