Departamenti i Gjuhëve të Huaja UNIKO - Faqja Zyrtare

🎓🌍 Një vit akademik i suksesshëm për kërkimin studentor dhe ndërkombëtarizimin

Gjatë vitit akademik 2025–2026, studentët e Departamentit të Gjuhëve të Huaja në Universitetin “Fan S. Noli” përfaqësuan universitetin tonë në një sërë konferencash studentore ndërkombëtare, duke prezantuar punimet e tyre kërkimore përkrah studentëve nga universitete të njohura evropiane.

Pjesëmarrja në këto aktivitete u koordinua nga Prof. as. dr. Eriola Qafzezi dhe Prof. as. dr. Daniela Stoica, ndërsa studentët u mbështetën në punën kërkimore dhe prezantimet e tyre nga pedagogët mentorë Prof. as. dr. Benita Stavre, Prof. as. dr. Dorela Kaçauni, Dr. Alda Cicko, Dr. Juliana Çyfeku dhe Dr. Edlira Xega. Përmes këtij bashkëpunimi, studentët tanë u përfshinë aktivisht në komunitetin akademik ndërkombëtar dhe fituan përvoja të vlefshme në fushën e kërkimit shkencor.

Konferencat studentore kane mbledhur çdo vit studentë dhe pedagogë nga një rrjet i gjerë universitetesh dhe institucionesh partnere, ku përfshihen Universiteti “Fan S. Noli” (Korçë), Universiteti “Vasile Alecsandri” i Bacău-t, Universiteti i Romës Tor Vergata, Universiteti Rovira i Virgili (Tarragona), Universiteti Ovidius i Konstancës, Universiteti i Malit të Zi, Universiteti i Letonisë, Universiteti i Vilniusit, Universiteti “Konstantin Preslavsky” i Shumenit, si dhe Fakulteti i Letrave, Qendra Universitare në Baia Mare, Rumani, ndër të tjera institucione evropiane.

Këto partneritete krijojnë një hapësirë të rëndësishme për dialog akademik, kërkim shkencor, shkëmbim përvojash dhe ndërkombëtarizim.
Përmes këtyre bashkëpunimeve të konsoliduara ndërkombëtare, Departamenti i Gjuhëve të Huaja ka krijuar mundësi të vazhdueshme për përfshirjen e studentëve në aktivitete shkencore, prezantime akademike, botime dhe rrjetëzim profesional në nivel evropian.

Studentët tanë prezantuan punime në fusha si gjuhësia, përkthimi, komunikimi, letërsia, media, kultura, mësimdhënia dhe studimet ndërkulturore. Një pjesë e këtyre kontributeve u botuan në përmbledhjet zyrtare të konferencave, duke u shndërruar në një burim të vlefshëm akademik dhe një platformë për bashkëpunime të reja kërkimore. Në disa prej këtyre aktiviteteve, studentët e UNIKO-s u vlerësuan edhe me çmime dhe vlerësime akademike, duke dëshmuar nivelin e lartë të përgatitjes dhe angazhimit të tyre.

👏 Falënderojmë studentët dhe pedagogët për përkushtimin, punën dhe përfaqësimin dinjitoz të Universitetit “Fan S. Noli” gjatë këtij viti akademik.

📚🌐 Me krenari mbyllim një vit të pasur me arritje, bashkëpunime dhe përvoja ndërkombëtare, duke forcuar më tej traditën e kërkimit shkencor, dialogut akademik dhe ndërkombëtarizimit të universitetit tonë.

📚Në kuadër të lëndës “Analizë Teksti II”, studentët e vitit të parë të programit Bachelor në Gjuhë Angleze prezantuan projektin përmbyllës krijues me temë “Inside Our Hearts, Different Dreams, One Class”, nën drejtimin e Dr. Juliana Tasellari Çyfeku .

Përmes shtatë tematikave të ndryshme, studentët eksploruan interesat, pasionet dhe përvojat e tyre duke përdorur gjuhën angleze si mjet komunikimi dhe shprehjeje. Aktiviteti u ofroi mundësinë të zhvillojnë aftësitë e prezantimit, punës në grup, komunikimit dhe krijimtarisë.

Projekti dëshmoi se diversiteti i interesave dhe bashkëpunimi mes studentëve mund të shndërrohen në një përvojë të vlefshme mësimore dhe sociale.

👏 Urime studentëve për angazhimin dhe pjesëmarrjen aktive në realizimin e projektit!

Në përputhje me kalendarin e aktiviteteve kërkimore dhe kulturore të Departamentit të Gjuhëve të Huaja, u zhvillua workshop-i "AI in Education", i organizuar nga Prof. As. Dr. Dorela Kacauni në bashkëpunim me pedagogun MSc. Realb Kushe.

Në këtë aktivitet morën pjesë studentët e programeve të studimit Bachelor në "Gjuhë Angleze", kursi I, dhe Bachelor në "Informatikë Biznesi", kursi I, të cilët prezantuan mënyra të ndryshme të përdorimit të inteligjencës artificiale në arsim dhe fusha të tjera, përmes videove dhe prezantimeve.

📚✍️ Suksese studentëve në sezonin e provimeve!

Departamenti i Gjuhëve të Huaja Universiteti "Fan S. Noli", Korçë - UNIKO iu uron të gjithë studentëve shumë suksese në provime!

Urojmë që puna, përkushtimi dhe këmbëngulja juaj të shpërblehen me rezultate sa më të mira.

Besoni në veten tuaj dhe jepni më të mirën! ✨

Në përfundim të lëndës Sintaksë e Gjuhës Angleze, studentët e vitit II të programit të studimit Bachelor – Gjuhë Angleze, zhvilluan një aktivitet ndërveprues në drejtimin e pedagoges Dr. Suela Koça. Ata patën mundësi të reflektojnë në mënyrë kritike rreth përvojës së tyre gjatë zhvillimit të kësaj lënde.

Per herë të parë kjo lëndë u zhvillua në formatin blended (mësimdhënie e kombinuar), si kurs pilot në kuadër të projektit BEWBU. Nëpërmjet diskutimeve, studentët identifikuan avantazhe, si: fleksibiliteti, efektshmëria e materialeve, prakticiteti i quizz-eve, shumëllojshmëria e detyrave, mundësia për bashkëpunim, zhvillimi i aftësive digjitale. Njëkohësisht u evidentuan edhe vështirësitë, të cilat lidhen kryesisht me probleme teknike dhe mungesë njohurish në përdorimin e platformës Teams. Ata bënë edhe propozime konkrete për përmirësim në të ardhmen, duke kontribuar në një proces sa më efektiv dhe në përshtatje me nevojat e studentëve.

PYGMALION" Një udhëtim interesant mes gjuhës dhe identitetit!

Studentët e vitit të tretë Bachelor "Gjuhe angleze" prezantuan analizat e tyre gjuhesore mbi veprën PYGMALION të George Bernard Shaw, duke analizuar rolin e gjuhës dhe komunikimit në formësimin e identitetit dhe statusit shoqëror.

Projekti u punua nen drejtimin e Prof. as. dr. Benita Stavre në lëndën e Historisë së gjuhës angleze duke pasur si fokus statusin e gjuhes standarde dhe dialektore ne fundshekullin e 19-të dhe fillimshekullin e 20të, dhe rëndësinë e saj si tregues i klasës shoqërore. Studentët sollën analiza gjuhësore, historike dhe sociolinguistike, duke vënë në pah se si standardizimi i gjuhës mund të shërbejë njëkohësisht si mjet fuqizimi dhe mekanizëm për ngritjen apo uljen shoqërore të individit.

Urime studentëve, Sofia Lara, Maria Berati, Anxhela Cenolli, Sidorela Came dhe Parashqevi Oshafi për kreativitetin me të cilin e trajtuan këtë projekt.