LU - Journalism Department

07/09/2026

20/06/2026

د لغمان پوهنتون ادبیاتو او بشري علومو پوهنځي د ژورنالېزم څانګې څلورم صنف محصلانو د زده کړو د بشپړېدو په ویاړ د قرآن کریم ختم ترسره کړ.

په دغه معنوی مراسمو کې د ادبیاتو اوبشري علومو پوهنځي رییس پوهنمل سردار ولي اسرار، د ژورنالېزم څانګې آمر پوهنیار عبدالصمد حدید، پوهنیار یحیی یعقوبي د یادې څانګې استادانو، تدریسي مدیر او ګڼو محصلانو حضور درلود.
د مراسمو په ترڅ کې استادانو د محصلانو د علمي او اخلاقي پرمختګ ستاینه وکړه او هغوی یې صداقت او د ژورنالېزم اصولو ته متوجه کړل. هغوی ټینګار وکړ چې ژورنالېزم یوازې یو مسلک نه، بلکې د ټولنې د اصلاح یوه مهمه وسیله ده.
محصلانو هم د خپلو استادانو له هڅو او لارښوونو مننه وکړه او ژمنه یې وکړه چې د خپل مسلکي ژوند په راتلونکي پړاو کې به د رښتینولۍ، عدالت او ژورنالېستیکو ارزښتونو ساتنه کوي. مراسم د دعا او د هېواد د پرمختګ لپاره د نیکو هیلو په څرګندولو سره پای ته ورسېدل.

24/05/2026

د لغمان پوهنتون ادبیاتو او بشري علومو پوهنځي ژورنالېزم څانګې دېوالي جرېدې، پرلپسې یوویشتمه ګڼه، چاپ او نشر شوه.

17/05/2026

د لغمان پوهنتون ادبیاتو او بشري علومو پوهنځي د څلور ګونو څانګو د څلورم ټولګیو محصلانو د پایلیکونو د دفاع لړۍ په رسمي ډول پیل شوه.
غونډه د قران کریم په مبارکو ایاتونو پیل شوه، چې پکې د لغمان پوهنتون د علمي چارو مرستیال ښاغلي پوهنیار مفتي وقایت الله وقار، د څېړنې او علمي مجلې مرستیال ښاغلي پوهنمل دوکتور نجیب الله فیاض، د ادبیاتو او بشري علومو پوهنځي رئیس ښاغلي پوهنمل سردار ولي اسرار، د پوهنځي مرستیال ښاغلي پوهنمل عمران الله خنجر، د څلور ګونو څانګو آمرین صاحبانو، درنو استادانو او لسګونه محصلانو حضور درلود.
د غونډې د پیل وینا د ادبیاتو او بشري علومو پوهنځي رئیس پوهنمل سردار ولي اسرار وکړه. نوموړي په خپلو خبرو کې د پایلیکونو د علمي ارزښت یادونه وکړه او ویې ویل، چې د پوهنځي محصلانو د خپلو څېړنیزو موضوعاتو په ټاکنه کې دقت کړی او هڅه یې کړې چې داسې موضوعات وټاکي، چې د ټولنې او علمي ډګر اړتیاوې پوره کړي. ښاغلي اسرار د پوهنتون رهبرۍ ته ډاډ ورکړ، چې محصلانو پر خپلو موضوعاتو جدي او دوامدار کار کړی او د استادانو تر لارښوونې لاندې یې خپلې څېړنې بشپړې کړې دي.
نوموړي همداراز د پوهنځي له استادانو او د دفاع له کمېټو وغوښتل، چې د پایلیکونو د ارزونې او دفاع پر مهال بشپړ شفافیت، عدالت او علمي اصول په پام کې ونیسي، څو محصلان د خپلې علمي هڅې واقعي پایله ترلاسه کړي او د څېړنې فرهنګ لا پیاوړی شي.
د غونډې بل ویناوال د لغمان پوهنتون د څېړنې او علمي مجلې مرستیال پوهنمل دوکتور نجیب الله فیاض و. نوموړي د اسلامي شریعت له نظره د علم او څېړنې پر ارزښت مفصل بحث وکړ او ویې ویل، چې اسلام د علم زده کړې او تحقیق ځانګړی مقام ټاکلی دی. هغه زیاته کړه، چې په اوسني عصر کې د علمي پرمختګ، ټولنیزو ستونزو د حل او د فکري ودې لپاره څېړنه یو اساسي ضرورت ګڼل کېږي.
ښاغلي فیاض محصلان وهڅول، چې یوازې د فراغت لپاره پر پایلیکونو بسنه ونه کړي، بلکې د علمي څېړنو لړۍ دې په راتلونکي کې هم جاري وساتي او د هېواد د علمي او فکري پرمختګ لپاره دې خپلې هڅې لا پراخې کړي.
د غونډې په پای کې د پوهنیار ذبیح الله عرب له لوري دعا وشوه او د پایلیکونو د دفاع رسمي بهیر پیل شو. تمه ده، چې د یادو دفاعو په ترڅ کې به محصلان خپلې علمي لاسته راوړنې وړاندې کړي او د خپلو څېړنیزو موضوعاتو اړوند به د استادانو پوښتنو ته ځوابونه ووایي.
ادبياتو او بشري علومو پوهنځي
فرهنګي کميټه

12/05/2026

د لغمان پوهنتون د ادبیاتو او بشري علومو پوهنځي ژورنالېزم څانګې درېیم ټولګي محصلانو د خپلو عملي کارونو د نندارې او ارزونې غونډه ترسره کړه. دغه غونډه نن یکشنبه د ۱۴۰۵ کال د غویي میاشتې په ۲۲مه نېټه د یاد پوهنځي د غونډو په تالار کې جوړه شوې وه، چې پکې د پوهنځي د رهبرۍ، د ژورنالېزم او انګلیسي څانګو د مشرتابه استادانو او لسګونه محصلانو ګډون کړی و.

په غونډه کې د ژورنالېزم څانګې د محصلانو له لوري پنځه تولید شوې راډیویي ډرامې وړاندې او وروسته یې د استادانو له لوري ارزونه وشوه.
یادې ډرامې د محصلانو د عملي زده کړو د پیاوړتیا، د راډیویي تولیداتو د مهارتونو د لوړتیا او د ژورنالېزم د مسلکي تجربو د پراختیا په موخه چمتو شوې وې.

د غونډې په پیل کې د ژورنالېزم څانګې آمر پوهنیار عبدالصمد حدید ګډونوالو ته ښه راغلاست ووایه او د عملي کارونو پر ارزښت یې خبرې وکړې. نوموړي وویل، چې د ژورنالېزم په څانګه کې عملي زده کړې د نظري مضامینو ترڅنګ ځانګړی اهمیت لري او محصلان باید د زده کړو ترڅنګ د تولید، لیکنې، غږ ثبت، ایډیټ او هنري وړاندې کولو په برخو کې هم عملي مهارتونه ترلاسه کړي. هغه د محصلانو هڅې وستایلې او د دغې برنامې د تنظیم او عملي کېدو له امله یې له پوهنیار یحیی یعقوبي څخه ځانګړې مننه وکړه. پوهنیار عبدالصمد حدید زیاته کړه، چې د ژورنالېزم څانګه کې د دې ډول عملي او نوښتګرو برنامو بنسټ د استاد یحیی یعقوبي له لوري اېښودل شوی او د یادو فعالیتونو ټول کریډېټ نوموړي ته راجع کېږي. د هغه په خبره، دا ډول برنامې د محصلانو وړتیاوې را برسېره کوي او هغوی د راتلونکي مسلکي ژوند لپاره چمتو کوي.

ورپسې د ادبیاتو او بشري علومو پوهنځي رئیس پوهنمل سردار ولي اسرار خبرې وکړې او د ژورنالېزم څانګې له مشرتابه او استادانو څخه یې مننه وکړه، چې د محصلانو عملي فعالیتونو ته دوامداره پاملرنه کوي. نوموړي د څانګې د استادانو او محصلانو ګډې هڅې وستایلې او ویې ویل، چې د عملي کارونو دوام د محصلانو پر فکري او مسلکي ودې مثبت اغېز لري.

د ادبیاتو او بشري علومو پوهنځي مرستیال پوهنمل عمران الله خنجر د تولید شویو ډرامو ارزونه وکړه. نوموړي د ژورنالېزم څانګې د محصلانو هغه وړتیا د ستاینې وړ وبلله، چې په محدودو امکاناتو یې د لوړ ارزښت لرونکې منځپانګې په تولید کې ښودلې ده. هغه د ډرامو منځپانګه، تخنیکي جوړښت، د غږ کیفیت، سناریو لیکنه او د موضوعاتو انتخاب مثبت وارزاوه او ویې ویل، چې دا ډول عملي فعالیتونه د محصلانو استعدادونه لا پسې پیاوړي کوي.

همدارنګه پوهنیار یحیی یعقوبي د راډیویي ډرامو د تولید بهیر، د محصلانو د هڅو او د عملي کارونو د اهمیت په اړه خبرې وکړې. نوموړي وویل، چې محصلانو د ډرامو د تولید په بېلابېلو پړاوونو کې په جدي ډول کار کړی او هڅه یې کړې چې د ژورنالېزم عملي اړخونه په واقعي بڼه تجربه کړي. هغه د پوهنځي او څانګې له مشرتابه څخه د برنامې په تنظیم او ملاتړ کې د همکارۍ له امله مننه وکړه. غونډه د ژورنالېزم څانګې د آمر پوهنیار عبدالصمد حدید په دعایې سره پای ته ورسېده

11/05/2026

د لغمان پوهنتون ژورنالېزم څانګې محصلانو د عملي زده کړو او مسلکي تجربو د پیاوړتیا په موخه علمي سفر ترسره کړ.

دغه علمي سفر چې د لغمان پوهنتون ادبیاتو او بشري علومو پوهنځي د ژورنالېزم څانګې له لوري د پوهنیار استاد یحیی یعقوبي په مشرۍ ترسره شو، پکې د یادې څانګې د څلورم ټولګي محصلانو ګډون کړی و. د سفر موخه له رسنیزو فعالیتونو، تخنیکي تجهیزاتو او د راډیو او ټلوېزیون د نشراتي چارو له عملي بهیر سره د محصلانو اشنایي وه.
د یاد سفر په ترڅ کې محصلانو د لغمان ولایت عمومي راډیو تلوېزیون او همدارنګه د زیار خصوصي راډیو څخه لیدنه وکړه. د دواړو رسنیو مسؤلینو او تخنیکي کارکوونکو محصلانو ته د منځپانګې د تولید، ثبت، اېډېټ، غږیزو او انځوریزو پروګرامونو د چمتو کولو او د خپرونو د نشر د څرنګوالي په اړه هر اړخیز معلومات وړاندې کړل.
همدارنګه محصلانو د راډیو او ټلوېزیون د سټوډیوګانو، کنټرول خونو، کامرو، مایکروفونونو، غږیزو سیستمونو، او نورو عصري تخنیکي وسایلو عملي مشاهده وکړه.
د ژورنالېزم څانګې استاد پوهنیار یحیی یعقوبي د دغه ډول علمي سفرونو ارزښت ته په اشارې وویل، چې د ژورنالېزم زده کړه یوازې په نظري درسونو بشپړېدای نه شي، بلکې محصلان اړتیا لري چې له عملي چاپېریال، رسنیزو بنسټونو او تخنیکي چارو سره مستقیمه بلدتیا پیدا کړي، ترڅو په راتلونکي کې د مسلکي خبریالانو او رسنیزو کارکوونکو په توګه غوره وړتیاوې ترلاسه کړي.
بل لور ته محصلانو هم د دغه علمي سفر څخه خوښي څرګنده کړه او ویې ویل: دا ډول سفرونه د هغوی د عملي پوهې، تخنیکي مهارتونو او مسلکي تجربو په زیاتوالي کې مهم رول لري.
د یادونې وړ ده، چې ژورنالېزم څانګې د محصلانو د علمي ظرفیت لوړونې او عملي مهارتونو د پیاوړتیا لپاره وخت ناوخت ورته علمي برنامې، ورکشاپونه او عملي سفرونه برابر کړي دي، چې د محصلانو له مثبت هرکلي سره مخ کېږي.

07/05/2026

د لغمان پوهنتون ژورنالېزم څانګې د اتم سمسټر محصلانو ته د ويناوالۍ په برخه کې د ظرفیت لوړونې درې ورځنی ورکشاپ په بري سره پای ته ورسېد.
ياد ورکشاپ کې د ژورنالېزم څانګې له لوري د ادبیاتو او بشري علومو پوهنځي د غونډو په تالار کې د یادې څانګې د څلورم ټولګي محصلانو ته دائر شوی و، درې ورځې یې دوام وکړ، په دغه ورکشاپ کې د ویناوالۍ پر پېژندلو، ډولونو، د اسلام په مبارک دین کې د ویناوالۍ ارزښت ، د سټېج مدیریت، د وېرې کنټرول، جرئت، د ژبې فصاحت او بلاغت او د وینا اړوند پر ګڼو نورو موضوعاتو بشپړ بحثونه ترسره شول.
یاد ورکشاپ د ژورنالېزم څانګې د درې تنه استادانو پوهنیار عبدالصمد حدید، پوهنیار یحیی یعقوبي او نوماند پوهنیار احمد ناصري له لوري وړاندې شو، چې د خپلو تجربو او علمي معلوماتو پر مټ یې محصلانو ته هر اړخیزې لارښوونې وکړې.
د یادونې وړ ده چې ژورنالېزم څانګې له دې وړاندې هم د خپلو محصلانو د ظرفیت لوړونې په پار ورته روزنیزې او علمي برنامې جوړې کړي دي.

04/05/2026

د ژورنالېزم څانګې ممتاز او فعال محصلان وستایل شول.
نېټه: ۱۴/۲/۱۴۰۵ ه ش

د لغمان پوهنتون ژورنالېزم څانګې د ۱۴۰۴ تحصیلي کال د خزاني سمستر د ممتاز او فعاله محصلانو تر څنګ دوه تنو میلمه استادانو ستاینه د یوې غونډې په ترڅ کې ترسره کړه.

غوڼده د قرآن کریم په څو مبارکو آیاتونو سره پیل شوه. د ښه راغلاست وینا د څانګې امر پوهنیار عبدالصمد حدید ترسره کړه، حدید پخپلو خبرو کې وویل: د ممتازو او فعاله محصلانو ستاینغونډه د نورو محصلانو لپاره د تشویق ذریعه ده. هغوی چې د خپل صنف په کچه ممتاز او بریالي شوي دي دا یو تصادف نه دی بلکې دا د خواریو او کوښښونو یو بهیر دی. هغوی بریالي کیږي. چې پخپل توان باور ولري. استاد حدید له میلمه استادانو مننه وکړه، چې خپله انرژي او قیمتي وخت د هېواد په تحصیلي نظام او د محصلانو په روزنه کې مصرفوي.

ورپسې د ادبیاتو او بشري علومو پوهنځي مرستیال رییس پوهنمل عمران الله خنجر وینا ترسره کړه او پخپلو خبرو کې محصلان سالم رقابت ته وهڅول او د ژورنالېزم څانګې له رهبرۍ څخه یې مننه وکړه، چې د خپلو استادانو او محصلانو هڅې ستایي. ښاغلي خنجر وویل: د ژورنالېزم څانګې مشرتابه په پوهنتون کې تل نوښتګرې چارې ترسره کړې دي، د دوی دا نوښت چې د مېلمه او افتخاري استادانو ستاینه کوي، د پوهنتون په کچه بې مخینې دی. نوموړي همدارنګه محصلان وهڅول تر څو د هېواد د سیال کولو لپاره خپلې زده کړې په غوره شکل سره وکړي. نوموړي وویل، هغه ملتونه چې له نورو سره ځان سیال کول غواړي چټک ګامونه اخلي او ځان د نورو ملتونو سره په یوه قطار کې دروي، زموږ ځوانان او محصلان هم د دې وړتیا لري چې د هېواد د پرمختګ لپاره کار وکړي او له نورو هېوادونو سره یې سیال کړي.

د غونډې بل ګډونوال پوهنیار یحیی یعقوبي وو او پخپلو خبرو کې محصلان مثبت رقابت ته وهڅول او له محصلانو یې وغوښتل چې خپل اکاډمیک فعالیتونه په منظم او دوامدار ډول تعقیب کړي، د وخت مدیریت ته پاملرنه وکړي او د ځان د پرمختګ لپاره روښانه اهداف وټاکي. هغه زیاته کړه چې بریالي محصلان هغه دي چې یوازې ځان په ټولګي پورې نه محدودوي، بلکې د مطالعې، څېړنې او عملي تجربو له لارې خپلې وړتیاوې لا پیاوړې کوي.

د غونډې په پای کې د ژورنالېزم څانګې دوه تنه میلمه استادان، محترم استاد ریحان ممتاز او محترم استاد نادر جمیل ته د هغوی د غوره تدریس او له ژورنالېزم څانګې سره د دوامداره همکارۍ له امله ستاینلیکونه ورکړل شول.
د ژورنالېزم څانګې د بېلا بېلو ټولګیو هغه محصلانو ته هم ستاینلیکونه ورکړل شول، چې پخپل ټولګي کې په لومړي، دویم او درېیم مقامونو راغلي وو او ترڅنګ یې د څلورم صنف فعاله محصلان، چې د ویاندویۍ، د جریدې په چاپ، د محصلانو مالي کمېټه، راپور جوړونې او نورو برخو کې خپل فعاله ونډه اخیستې وه په ستاینلیکونو وستایل شول.
غونډه د ادبیاتو او بشري علومو پوهنځي د تدریسي مدیر قاري عبدالهادي رشیدي په دعایې سره پای ته ورسېدله.

04/05/2026

د ژورنالېزم څانګې محصلانو ته د کاري مرکې په اړه علمي سمینار وړاندې شو

د لوړو زده کړو په بنسټونو کې د محصلانو علمي او مسلکي ظرفیت لوړونه د تدریسي بهیر مهمه برخه ګڼل کېږي. د همدې موخې لپاره، د لغمان پوهنتون د ادبیاتو او بشري علومو پوهنځي د ژورنالېزم څانګې له لوري د “کاري مرکې” تر عنوان لاندې یو علمي سمینار د څلورم ټولګي محصلانو ته وړاندې شو.

د یاد سمینار اساسي موخه دا وه چې محصلان د کار موندنې له مهم پړاو یعنې کاري مرکې سره بلد شي او د مرکې اړوند بنسټي مهارتونه تر لاسه کړي.

سمینار د ژورنالېزم څانګې استاد پوهنیار یحیی یعقوبي له لوري وړاندې شو. نوموړي د کاري مرکې پر مفهوم، ارزښت، د مرکې لپاره پر مخکیني چمتووالي، مناسبو جامو، د اړینو اسنادو پر ترتیب او اړوندو نورو مهارتونو هر اړخیز بحث وکړ. همدارنګه، د مرکې پر مهال د اړیکو مهارتونه، بدني ژبه، د غږ ټون او د باور کچه د بریالیتوب له مهمو عواملو څخه وبلل شول. استاد د مرکې عامې پوښتنې لکه د ځان پېژندنه، دندې ته د لېوالتیا دلیلونه او پر فردي وړتیاوو قوتونو او کمزوریو باندې هم بحث ترسره کړ.

د ژورنالېزم څانګې امر، پوهنیار عبدالصمد حدید، د یاد سمینار له تنظیموونکي استاد څخه مننه وکړه او څرګنده یې کړه چې دا ډول علمي او عملي پروګرامونه د محصلانو د مسلکي ودې او ظرفیت لوړونې لپاره مهم ارزښت لري. د ګډونوالو له لوري د یاد پروګرام هرکلی وشو او د ورته نورو علمي فعالیتونو د دوام غوښتنه وشوه.

30/04/2026

پوهنتونونه علمي مرکزونه دي او د علمي موخو د ترلاسه کولو لپاره ترېنه ګټه پورته کیږي. نور حال په راپور کې..