Dawlat Waziri

19/08/2026

18/08/2026

د افغانستان د خپلواکۍ د کلیزې د مبارکۍ پیغام
د افغانستان د خپلواکۍ د ویاړلې کلیزې په مناسبت د هېواد ټولو درنو او پتمنو خلکو، په ځانګړې توګه د آزادۍ د لارې د شهیدانو درنو کورنیو او ټولو وطنپالو افغانانو ته د زړه له کومې مبارکي وړاندې کوم.
دا ورځ زموږ د ملي غرور، آزادۍ او سرلوړۍ ورځ ده. هغه ورځ چې د افغان ولس د مېړانې، یووالي او قربانیو یاد تازه کوي.
هیله ده چې د خپلواکۍ دا مبارکه ورځ زموږ د ملي یووالي، سولې، ثبات او د یوه آباد او سرلوړي افغانستان د جوړېدو لپاره د نوې ارادې پیلامه وګرځي.
د افغانستان خپلواکي دې تلپاتې وي!
افغانستان دې آباد، آزاد او سرلوړی وي!
د افغان ولس ژوند دې له سولې، خوښۍ او سوکالۍ ډک وي.
د خپلواکۍ کلیزه مو مبارک شه!
درنښت
دولت "وزیري

18/08/2026

د مطبوعاتو ارزښت:
مطبوعات کولای شي د یوه کس څخه په کمه وخت کې وزیر او یا رزیل جوړ کړي.

17/08/2026

ملخ یکدفعه جستی، دو فعه جستی، اخر بدستی!

16/08/2026

افغانستان ته متوازن او خپلواک سیاست پکار دی
افغانستان د تاریخ په اوږدو کې داسې جغرافیه وه چې د لویو قدرتونو د سیالیو څپو به یې ساحلونه یو په بل پسې لړزول. زموږ خاوره د ختیځ او لویدیځ، شمال او جنوب ترمنځ د تګ راتګ لاره وه، خو له بده مرغه ډېر ځله د دې ستراتیژیک موقعیت پر ځای زموږ د کمزوریو له امله نورو د خپلو سیالیو ډګر ګرځولی دی.
نن چې افغانستان د خپل تاریخ له یوې حساسې مرحلې څخه تېرېږي، تر هر بل وخت ډېره اړتیا ده چې د هېواد بهرنی سیاست د احساساتو پر ځای پر عقل، د شعارونو پر ځای پر ملي ګټو، او د موقتي دوستیو پر ځای پر ثابتو ملي اصولو ولاړ وي.
افغانستان نه د ختیځ ملک دی او نه د لویدیځ، افغانستان د افغانانو هېواد دی.
زموږ لپاره تر ټولو مهم اصل باید دا وي چې له هر هېواد سره اړیکې د افغانستان د ملي ګټو په تله وتلل شي. که له کوم هېواد سره اقتصادي اړیکه زموږ د خلکو د کار، سوداګرۍ او پرمختګ سبب کېږي، باید پیاوړې شي. که له بل هېواد سره سیاسي اړیکه زموږ د امنیت او ثبات لپاره ګټوره وي، باید وساتل شي. خو هېڅ اړیکه باید دومره ژوره نه شي چې د افغانستان اراده تر سیوري لاندې راولي.
متوازن سیاست:
نه دښمني، نه غلامي
متوازن سیاست دا نه دی چې افغانستان دې له ټولو هېوادونو سره فاصله ونیسي، بلکې معنا یې دا ده چې له ټولو سره اړیکې ولري، خو د هېڅ یوه قدرت تابع نه شي.
افغانستان باید له پاکستان سره د متقابل احترام، سوداګرۍ، سرحدي تفاهم او د امنیت پر بنسټ اړیکې ولري. له ایران سره د ګډ تاریخ، کلتور، او اقتصادي همکاریو دروازې پرانیستې وساتي. له چین، روسیې، هند، منځنۍ اسیا، عربي هېوادونو، اروپا او امریکا سره هم د خپلو ملي ګټو پر بنسټ اړیکې پراخې کړي.
د یوه هېواد دوستي باید د بل هېواد دښمني نه وي.
همدا متوازن دریځ کولای شي افغانستان له هغې خطرناکې سیالۍ څخه وژغوري چې لوی قدرتونه پکې خپلې ګټې لټوي او د کمزورو هېوادونو ولسونه یې بیه پرې کوي. د افغانستان د جغرافیایي موقعیت له امله د بې‌طرفۍ او متوازن تعامل مفکوره د اوږدمهاله ثبات او اقتصادي همکاریو لپاره د بحث وړ یوه مهمه لاره ګڼل شوې ده.
خپلواکي یوازې په شعار نه ساتل کېږي
خپلواکي یوازې دا نه ده چې د هېواد بیرغ په رسمي ودانیو کې رپېږي، اصلي خپلواکي هغه وخت معنا پیدا کوي چې د یوه ملت سیاسي پرېکړې، اقتصادي تګلاره او ملي امنیت د بل چا په اراده پورې تړلي نه وي.
که افغانستان اقتصادي کمزوری وي، بهرنیو مرستو ته محتاج وي او خپل تولید ونه لري، سیاسي خپلواکي یې هم له ستونزو سره مخ کېږي. له همدې امله زموږ د بهرني سیاست تر څنګ باید اقتصادي خپلواکي هم د ملي ستراتیژۍ مهمه برخه وي.
افغانستان باید خپل کرنیز تولید پیاوړی کړي، کانونه په شفافه او ملي ګټوره توګه مدیریت کړي، د انرژۍ سرچینې پراخې کړي، سوداګریزې لارې فعاله کړي او له منځنۍ او جنوبي اسیا سره د وصل پر یوه اقتصادي مرکز بدل شي.
هغه افغانستان چې خپل اقتصاد جوړ کړي، له نړۍ سره په برابر دریځ خبرې کولای شي.
له نړۍ سره اړیکې، د عزت او متقابل احترام پر بنسټ
افغانستان له نړیوالې ټولنې څخه جلا کېدل نه شي کولای، او نه باید وغواړي. نړۍ هم افغانستان ته اړتیا لري او افغانستان هم نړۍ ته اړتیا لري.
د ملګرو ملتونو اوسنی مأموریت هم د افغانستان د سولې، ثبات، اقتصادي پیاوړتیا، بشري مرستو، ملي حکومتولۍ او له افغانانو او نړیوالو لورو سره د رغنده تعامل موضوعات د خپل کار له مهمو برخو ګڼي.
خو نړیوال تعامل باید د ملي حاکمیت او متقابل احترام پر بنسټ وي. افغانستان باید د نړۍ له هېوادونو سره د خبرو مېز ته د یوه محتاج ملت په توګه، نه، بلکې د یوه خپلواک هېواد په توګه کښېني.
موږ باید له نړۍ څخه زده کړه وکړو، له نړۍ سره تجارت وکړو، علم او ټکنالوژي ترلاسه کړو، خو خپل ملي هویت، فرهنګ، ارزښتونه او سیاسي استقلال هم وساتو.
ګاونډیان د افغانستان د راتلونکي مهمه برخه دي
افغانستان له جغرافیې څخه خپل ګاونډیان نه شي بدلولای، نو هوښیار سیاست دا دی چې له ګاونډیانو سره د دښمنۍ پر ځای د تفاهم، سوداګرۍ او ګډو ګټو زمینه پراخه شي.
د افغانستان ثبات د سیمې ثبات دی، او د سیمې ثبات د افغانستان لپاره اقتصادي فرصتونه رامنځته کوي.
د رېل پټلۍ، برېښنا، ترانزیټ، سوداګرۍ، اوبو او انرژۍ په برخو کې سیمه‌ییزه همکاري کولای شي افغانستان د جګړې له جغرافیې څخه د اتصال او اقتصاد پر جغرافیه بدل کړي.
افغانستان باید داسې هېواد شي چې ګاونډیان یې د ستونزې سرچینه نه، بلکې د ګډې ګټې شریک وبولي.
ملي اجماع: د خپلواک سیاست بنسټ
تر ټولو مهمه خبره دا ده چې بهرنی سیاست یوازې د حکومت کار نه دی، بلکې د ټول ملت د اوږدمهاله ګټو موضوع ده.
تر هغو چې افغانان په خپلو کې سیاسي اختلافات په سوله‌ییزه او عقلاني توګه حل نه کړي، بهرني ځواکونه به تل د داخلي اختلافاتو د کارولو فرصت پیدا کوي.
موږ داسې ملي اجماع ته اړتیا لرو چې پکې د افغانستان ټول ولس ځان وویني؛ داسې اجماع چې د هېواد د استقلال، امنیت، اقتصادي پرمختګ، عدالت، تعلیم او ملي یووالي پر محور ولاړه وي.
افغانستان باید د داسې نظام خاوند وي چې ولس ته د باور وړ وي او نړۍ ته د تعامل وړ.
د پای خبرې
افغانستان د جګړو له اوږده فصل وروسته تر هر څه وړاندې سولې، ثبات، اقتصادي پرمختګ او هوښیار سیاست ته اړتیا لري.
موږ باید له هېڅ قدرت سره دایمي دښمني ونه کړو او له هېڅ قدرت سره دایمي تړاو هم ونه تړو. زموږ دایمي دوست باید د افغانستان ملي ګټه وي.
د افغانستان راتلونکی باید په دې اصل ولاړ وي:
له ټولو سره اړیکې، خو له هېچا سره غلامي نه؛
له ټولو سره همکاري، د هېچا تابعیت نه؛
له نړۍ سره تعامل، خو د خپلواکۍ په ساتلو؛
له ګاونډیانو سره دوستي، خو د ملي حاکمیت په چوکاټ کې.
که افغانستان وکولای شي خپل بهرنی سیاست له احساساتي دریځونو څخه د ملي محاسبې، متوازن تعامل او خپلواک تصمیم پر لور بوځي، نو همدا ستراتیژیک موقعیت چې کلونه یې زموږ لپاره د کړاوونو سرچینه وه، کولای شي د سبا افغانستان لپاره د سولې، سوداګرۍ، اتصال او پرمختګ د طلايي پل په توګه وکارول شي.
افغانستان باید نور د نورو د سیالیو میدان نه وي،
افغانستان باید د خپل برخلیک خپلواک لیکوال وي.
درنښت
دولت "وزیري"