رويال إكسباند - Royal Expand

اذا قلنا ليك حتقدر توفر الف مصدر بتاع دخل وانت في مكانك؟! .. حتختار يكونو جايين من وين؟! 🤔

طيب أول حاجه لازم تعرفها عن مصدر الدخل .. انه ما مرتبط باسمك ولا عمرك ولا حتي موقعك .. يعني ممكن تعمله وين ما كنت أن شاء الله في ( كهف )

المهم .. نبدأ:
زي ما قلنا عندنا اربعه فئات للمال ( مصدر الدخل )
اللي هي : ( موظف – صاحب مهنه حره – صاحب مشروع – مستثمر )

1️⃣ خلينا نتفق انه مممكن تكون فقير انت صاحب مشروع عادي .. وممكن تكون غني وانت موظف ..

ففكره انه تكون غني أو فقير ما ليه علاقه بموقعك في مخطط التدفقات الماليه! فهمت الفكره؟!

2️⃣ ما كل الفئات متساويه .. وكل فئه عندها مميزاتها .. مثلا .. لو أنت موظف حيتوفر ليك تأمين أو تسهيل معاملات وكدا!

3️⃣ الطرق المختلفه لجني المال .. هنا بكون عندك خيارين والاتنين عندهم نفس نتيجه المال :
– أول شي تشتغل عشانه .. ( موظف أو صاحب مهنه )
– تاني شي يشتغل عشانك .. ( صاحب أو مستثمر )

فأنت لو خيروك بين انك تشتغل عشان القروش .. أو هي تشتغل عشانك حتختار شنو؟!
( أكتب اجابتك عشان نوريك عقليتك عقليه غني ولافقير )

.. من كتاب التدفقات الماليه .. لماذا لا تحصل على وظيفه؟!

تلخيص وكتابه .. ..

شغال شنو؟! .. ولا لسا بابا بصرف عليك؟! 😐
وبابا اللي بصرف عليك دا زاتو بجيب قروش من وين؟!

طيب مبدئيا!! .. في العالم كله في أربعه تصنيفات بس للمال ..
E / B / I / S

خلينا نسميها sebi .. نطقها سيبي .. ( ياها حقت غنيه .. سيبي وبكره الشوق ينادي .. 😂 )

نركز .. نركز .. أنت بتجيب قروشك من أي نوع فيهم؟!

: 1️⃣E — Employee
اللي هو ( موظف ) .. بتشتغل عند حد وبتاخد راتب ثابت.
وقتك = قروشك .. باختصار ما شتغلت ما اكلت.

2️⃣S — Self-Employed
يعني شغال ( لحسابك الخاص) .. دكتور، محامي، فريلانسر، كوتش .. إنت الشغل.
لو مريضت أو غبت، القروش وقفت.

3️⃣B — Business Owner
ترجمتها (صاحب بزنس) .. عندك نظام أو تيم بيشتغل بدونك. إنت بتملك الشغل، الشغل ما بيملكك.

4️⃣I — Investor
أنت هنا (مستثمر 😎 ) فلوسك هي اللي بتشتغل عنك.
في عقارات، أسهم، مشاريع .. إنت نايم والقروش جاية.

أكتب لي رقم تصنيفك الحالي! في التعليقات .. عشان نوريك الخطوه اللي بعدها .. عشان تصل لمرحله الحريه الماليه 👏🔥

والبوست الجاي حنتكلم عن كيف تطلع قروش منهم الاربعه .. حتى لو ما عندك خبره أو دارس بزنس!

.. والله يرزقك معاي القروش الكتار 😌🔥

بيل غيتس ما كمل جامعته .. وستيف جوبز ما كمل جامعته ..
ولا حتى هنري فورد ما كمل جامعته .. وكلهم بنوا إمبراطوريات .. 🔥
فهل التعليم مهم؟!

فيه ناس شايفين في ده دليل إن التعليم ما مهم .. ونحنا شايفين أنه فيه سؤال تاني!!

السؤال مش "هل أدرس ولا لا؟"

السؤال هو:
أنت بتدرس عشان تحقق شنو؟

لأننا كلنا اتعلمنا نفس الجملة من أول يوم في المدرسة:
"أجيب درجات كويسة = أجيب وظيفة كويسة."

– اتعلمنا نفتش عن الأمان .. لكن ما اتعلمنا نبني الأصول .. 👏

– اتعلمنا كيف ندخل القروش .. لكن ما اتعلمنا كيف نخلي الفلوس تشتغل لينا.

روبرت كيوساكي قال الفرق في جملتين بس:
الأب الفقير: "أدرس عشان تلقى وظيفة."
الأب الغني: "أدرس عشان تفهم كيف تبني مشروع."

نفس الجملة .. فرق في التفكير بالكامل ..

⭕ تنويه!
نحنا ما حنقول ليك ما تدرس .. بس بقولك اعرف ليه حتدرس!!

لو تعليمك بيخدم هدفك، تمسك فيه بكل قوة .. لو ما بيخدمه، وجّهه عشان يخدمه.

القروش مش بتتعلمها في الفصل .. بتتعلمها وأنت بتتحمل مسؤولية تفكيرك.

طيب أسي .. شنو الحاجة الاتعلمتها في المدرسة أو الجامعة وحاسس إنك ما استفدت منها لحد هسي؟

ماف زول يقول جمله ( المغول قبائل بربريه رعويه تسكن أواسط اسيا .. 🤭 )

.. انا لو فتحت مدرسة حتجو ؟

تخيل معاااااي أنه 95% من ثروه كل العالم عند 5% بس من الناس!! 😳

السؤال الأهم ليه؟!

هل ده لأنهم أذكى؟
هل ده لأنهم اتعلموا أكتر؟
هل ده لأنهم اشتغلوا أصعب؟

الاجابه .. لا
قالها كيوساكي ( مؤلف كتاب الأب الغني والأب الفقير ) في جملة واحدة:
"الأغنياء ما بيشتغلوش مقابل القروش .. بيخلوا الفلوس تشتغل عنهم."

بتالي عزيزي المليونير المستقبلي!
الفرق ما في المجهود .. الفرق في طريقة التفكير تجاه القروش!

أنت كيف بتفكر في القروش؟
1️⃣ وسيلة للعيش
2️⃣ هدف أسعى ليه
3️⃣ أداة تشتغل بدلي
4️⃣ ما فكرت فيها كده أصلاً

.. لو عايز تبقى زي أنت صاحب القرار!

تخيل أنك وصلت مرحلة من الفقر لدرجة ما عندك بيت .. وبتنوم في عربية، وحقوقك الطبيعيه حقت الاكل والشراب ما قادر عليها!

شنو أول قرار حتاخدو؟!
1️⃣ أفتش وظيفة بأسرع وقت.
2️⃣ أبدأ مشروع صغير.
3️⃣ أتعلم مهارة أبيعها.
4️⃣ عندي إجابة مختلفة.

أكتب رقمك في التعليقات .. بس المثير للاهتمام والغريب
إنه أكثر من 80% من الناس حيختاروا (1) .. ونفس ال80% ما حتقدر تقنعهم بأنه الوظيفه ما حل!

وده طبيعي جداً .. لأنهم ما فاهمين الفرق بين الأمان الوظيفي والحريه الماليه!

لكن السؤال الحقيقي:
لو الوظيفة هي الحل النهائي للفقر .. ليه في ملايين الموظفين حول العالم لسه بيشتكوا من الديون والضغوط المالية؟!

الفرق ببساطة:
– الأمان الوظيفي = راتب ثابت مقابل وقتك.
– الحرية المالية = دخل يستمر حتى لو ما اشتغلت اليوم.

الأمان الوظيفي حيخليك تعيش .. الحرية المالية تخليك تختار كيف تعيش.

ما عندي مشكلة مع الوظيفة .. لكن عندي مشكلة مع الشخص البفتكر إنها نهاية الطريق.

الوظيفة ممكن تكون بداية ممتازة .. لكن لو وقفت عندها فقط، غالباً حتفضل تستبدل وقتك بالمال طول عمرك.

الآن بعد ما قرأت الكلام دا .. هل أنت فعلاً شايف إن الوظيفة هي الحل؟ .. ولا مجرد مرحلة مؤقتة؟

ولو عايز تعرف تصل للحريه الماليه .. ( حر 🦅 ) .. وحنرسل ليك الطريقه!

أنا .. أنا بشرح ليك وأنت صاحب القرار!

دقيقه دقيقه!!
أسي لو سألتك سؤال أنت موقعك شنو من الاعراب؟! .. أوتصنيفك شنو!
( غني – فقير – متوسط الحال – يعني – ما عارف! )

خليني من تصنيفك في الحياه وطبقتك الاجتماعيه!
تصنيفك شنو من التصنيفات الاربعه للمال!!

لو أجابتك ما عارف .. تعال نشرح ليك!
تخيل معاي إنك عايز تمشي في طريق .. بس انت ما عارف وضعك وين اساسا عشان تعرف تمشي للخطوه اللي بعدها!

بتالي ما حتعرف تمشي لأنك ما عارف انت وين .. ولو ما عرفت تمشي معناها ما حتصل .. ولو ما عرفت تصل ما حتعرف تنجح!

فعشان كدا جبنا ليك 😌 .. عشان يلخص ليك كتاب التدفقات الماليه .. ويطلع احسن ما فيك وتتحول إلي صاحب مشروعك ومستثمر ناجح 🔥

فمهما كان وضعك المالي حاليا .. أو موقعك في العالم .. أو عمرك .. كتاب التدفقات الماليه حيغير نظره للقروش تماماااا .. بتالي حتعرف تطلع قروش أسهل وأكتر! .. 🤷‍♂️

كل اللي عليك حاليا .. تكتب ( أسمك + الدوله اللي انت فيها )
وحنرسل ليك تفاصيل السلسله كامله ..

ما حيخليك تحتار 😌🔥

لو إنت (1) أو (2) فانت فاشل!! 😬
بتالي مهما تغير الشغل .. ومهما سافرت .. ومهما أخذت كورسات حتلقى نفسك فاشل!

أما لو إنت (3) .. فإنت 😐 ..

أما لو إنت (4) .. فإنت رهيب .. اسطور .. إمبراطور يمشي على الأرض .. من النوع البيدخل أي مكان ويصنع قيمة حقيقية.

أنت النوع الشركات بتتنافس عليه .. ومن النوع الببني ثروة حتى لو بدأ من الصفر!

لكن قبل ما أشرح ليك الأنواع الأربعة .. تعال أسألك سؤال:

لو صحيت بكرة ولقيت في حسابك ملييييييار جنيه!!؟
هل حتعرف تخليه يزيد؟
ولا حتضيعه؟
ركز في السؤال كويس ..

لأن الفرق بين الغني والفقير غالباً ما بيكون في كمية المال .. بيكون في طريقة التفكير.

عشان كدا 🤩 .. حنبدا أقوى سلسلة نزلت في الصفحة.

سلسلة مبنية على كتاب غيّر حياة ملايين البشر حول العالم .. ( كتاب الأب الغني والأب الفقير الجزء التاني )

كتاب خلّى ناس تطلع من الديون .. وتبدأ مشاريع .. وتبني أصول. وتفهم اللعبة الحقيقية للمال ♥️🔥

⭕ سواء كنت:
✔ طالب
✔ موظف
✔ صاحب مشروع
✔ عاطل
✔ أو حتى دخلك ممتاز
السلسلة حتغير حياتك!!

⭕ الخطة؟
45 بوست.
45 درس.
45 صدمة فكرية.
وكل بوست حيخليك تشوف المال بطريقة مختلفة عن اليوم القبله.

وفي نهاية السلسلة .. وعد حتكون شخص مختلف تماماً عن الشخص القاعد يقرأ البوست دا الآن.

🔥 لو ناوي تكمل الـ45 بوست للنهاية .. اكتب "جاهز" في التعليقات.
عشان نشوف كم زول فعلاً مستعد يغيّر مستقبله المالي.

وما تنسى الفولو عشان ما يفوتك أول درس .. 😁

تحياتي

لو فاكر انك محتاج رأس مال ضخم أو تطلع من الصباح للمغارب عشان تبدأ.. تبقى غلطان!😐

كل يوم بمر عليك وانت ما بتتحرك فيه هو يوم بيخصم من عمرك ومن فرصك.. يا اما خطوة تقربك من أول دولار يدخل جيبك يا إما يوم ضايع زي باقي الأيام الصفرية..

و في النهاية كلنا حنموت.. بس انت عايز تموت غني و لا فقير؟

الزمن ده بقى زمن "الذكاء الشغال".. و انت قاعد في بيتك و بنفس التلفون الفي يدك ده (البتضيع فيه ساعات في اللف والدوران بدون فايدة).. بتقدر تفتح لنفسك باب رزق محترم..​الحل في كلمة (مهارة).. ​

اتعلم مهارة مطلوبة أونلاين وأنت في غرفتك..
اصنع فرصة رزقك بنفسك..
ما تقعد في صف المنتظرين الوظيفة التقليدية..

اكتب لينا شنو المهارة العايز تتعلمها؟ 👀

😌🔥

شنو الفرق بين صاحب الشركة و الموظف.. و شنو الفرق ما بين مشروع فعلا يعيش.. ومشروع ينهار أول ما تتعب؟..😐

بس اول خليني اقول ليك على الفرق الاساسي بين المشغل و المخطط الاستراتيجي.. المشغل ده هو الشخص البيدخل في كل حاجة.. هو البشغل العمليات اليومية كلها و هو البشغل السستم..

اما المخطط الاستراتيجي.. فهو البضع النظام الحيخلي الشركة تشتغل على المدى الطويل.. و اذا مشروعك حيقيف اول ما تتعب معناها انت مشغل..

الفرق الحقيقي بين الموظف و صاحب الشركة هو طريقة التفكير..

فلو شغلك واقف عليك انت بس معناها انت ما صاحب شركة و لسه موظف عند نفسك

و انت اي نوع مشغل او مخطط؟..👀

تخيييل معاي انه اكبر مستورد للماشية السودانية هي دول الخليج! و في دول الخليج السوق السعودي هو المتصدر!😐

قال ليك يعد السوق السعودي المستورد الأكبر للماشية السودانية.. و موخرا أعلنت وزارة الثروة الحيوانية عن بدء استئناف الصادرات وتجهيز محاجر ومسالخ رئيسية (مثل الكدرو والقضارف) لتغطية العقود..

(لانه اتوقف التصدير في فترة ما بين اواخر ال2022 و بداية ال23 بسبب ظروف صحية و استمر بسبب ظروف الحرب)

و على سبيل المثال.. بدأ التصدير بشحنات تجريبية وصلت حد 5000 رأس من الضأن في الفترة الأخيرة كبداية لاستعادة التدفقات اللي كانت بتجيب ربح حوالي 500 مليون دولار سنوياً..👀

بما انه التصدير رجع تاني من هسى لأضحى جاي حتقدر تدخل سوق الماشية؟👀