25/09/2026
هام جداً جداً ...
في شي لازم نحكيه بصراحة، لأنو صار في كتير شغلات حوالينا على LinkedIn شكلها مهني… بس لما تسأل عن أثرها الحقيقي، ما بتلاقي شي.
ورشات، ندوات، Webinars، شهادات، خبراء، حكي عن سوق العمل، حكي عن الـHR، حكي عن تطوير المهارات، حكي عن كيف تلاقي شغل…
بس بالنهاية: مين لاقى شغل؟ مين انحلت مشكلته؟ مين انفتحله باب؟ مين اتوصل بشركة؟ ومين استفاد فعلاً؟
ومن كتر ما عم شوف هالمشهد، ومن كتر الأشخاص اللي عم يحكوا معي عن مشاكلهم بالعمل، وعن صعوبة البحث عن فرصة، وعن مشاكلهم مع المدراء، والتوظيف، والرواتب، وبيئة العمل… ومن جهة تانية الشركات اللي عم تعاني لتلاقي الأشخاص المناسبين…
طلعت براسي فكرة WorkTalk | نحكي شغل.
مو Webinar جديد أحكي فيه أنا ساعة والناس تسمعني.
ومو Workshop نخلصه، ناخد صورة، ونرجع كل واحد على مشكلته.
الفكرة إننا نجمع الناس اللي عندها علاقة حقيقية بسوق العمل حول طاولة واحدة: HR، Recruiters، أصحاب شركات، Managers، موظفين، وباحثين عن عمل… ونحكي عن الشغل مثل ما هو فعلاً.
عن التوظيف والمقابلات، الرواتب، مشاكل الموظفين والمدراء، الفرص، بيئة العمل، وتحديات الشركات والباحثين عن عمل.
بس الهدف مو الحكي. الهدف نشوف إذا فينا نعمل شي حقيقي.
إذا شركة عم تدور على موظف، يمكن نلاقي الشخص المناسب بالغرفة.
إذا شخص عنده مشكلة مهنية، يمكن حدا عنده الخبرة اللي تساعده.
إذا عندك فرصة، خبرة، معرفة أو علاقة مهنية ممكن تفيد غيرك، خلينا نوصلها.
وأول جلسة ما رح تنعمل لمجرد إنو لازم نعمل جلسة.
ما رح يكون في لقاء إلا إذا وصلنا لعدد مناسب من المشاركين، لأنو بدون ناس حقيقية ومشاركة حقيقية… ما في WorkTalk.
إذا وصلنا للعدد المناسب، منعمل أول جلسة Pilot.
وإذا نجحت التجربة وطلع منها أثر حقيقي، مو بس صور وحكي… هدفي تتحول WorkTalk | نحكي شغل إلى جلسة أسبوعية مستمرة.
جلسة فيها ناس، مشاكل حقيقية، فرص حقيقية، علاقات مهنية، وحلول ممكن تبدأ من نفس الطاولة.
ما بدي نعمل فعالية جديدة.
بدي نشوف إذا فينا نعمل فرق فعلاً.
إذا حابب تكون جزء من البداية، سجّل من هون:
https://lnkd.in/ezbMDQrH
WorkTalk | نحكي شغل
نحكي عن الشغل كما هو… ونحاول نعمل فرق.
Basil Ghrayeb
Human Resources Expert
This link will take you to a page that’s not on LinkedIn
