Ask Afnan

الزوج اللي بيضرب زوجته بيلوم المدرسين اللي بيضربوا الطلاب
و محبة الكلاب اللي بتدافع عنهم ضد العنف بتنصح جارتها تضرب بنتها المراهقة اللي مش بتسمع الكلام
و كلهم مصدومين من دكاترة النسا اللي بتضرب السيدات وقت الولادة
دايرة عنف مش هتقف غير بقرار و وعي

صباح الخيرات ❤️

"ابني متأخر في القراءة."
"ابني في الابتدائي ولسه مش بيعرف يقرأ."
"بنتي بتقرأ، بس مش بتعرف تجاوب على أسئلة أو تستخرج معلومات من اللي قرأته."

كل دي مشكلات مختلفة، ومش معناها إن كل الأطفال محتاجين نفس الحل.

في النهاية إحنا محتاجين الطفل يقرأ، لأن القراءة هي اللي هتساعده يتعلم الرياضيات والدراسات والتربية الإسلامية والعلوم وباقي المواد.
لكن القراءة المطلوبة مش مجرد تهجي أو نطق أصوات الكلمات، إحنا محتاجين قراءة بفهم واستيعاب.

عشان كده مفيش حل سحري واحد ينفع مع كل الأطفال.

تعالي أقولك ليه
مستويات تعليم الفونيكس عادة بين بتوصل ل 15 مستوى أحيانًا حسب المنهج أو البرنامج المستخدم.

ولذلك قبل ما نبدأ أي خطة دعم، لازم الأول نعمل تقييم يحدد:

الطفل واقف فين بالضبط؟
المهارات اللي أتقنها؟
المهارات اللي لسه محتاج يشتغل عليها؟

وفي بعض الحالات بنحتاج نستبعد أسباب طبية أو عضوية ممكن تكون مؤثرة على التعلم، مثل:
ضعف النظر، ضعف السمع، مشكلات النطق واللغة، اضطرابات النوم، أو بعض الاضطرابات النمائية التي قد تؤثر على اكتساب مهارات القراءة.

بعد كشف و استبعاد من الطبيب للأسباب العضوية ييجي دورنا نحدد سبب التأخر الحقيقي، وعلى أساسه نضع خطة دعم تناسب احتياجات الطفل وقدراته وظروفه.

لأن كل طفل له نقطة بداية مختلفة... وبالتالي خطة الدعم المناسبة له مختلفة أيضًا. 

صباحكوا ورد على فل و ياسمين ❤️

لما جارتك اللي واخدة دكتوراة في تربية كل الأطفال تنظر عليك 😁
ما تنسيش تحطي إيدك في وسطك كدة و أنت بتسأليها 🤭

لما نغير ال mindset بتاعتنا في نظرتنا لسلوكيات ولادنا
هنفهمهم أكتر و هنبص للموضوع من زاويتهم هم و هنميل أكتر لمساعدتهم بدل من إصدار الأحكام و وصفهم بصفات ممكن تأثر عليهم طول العمر ❤️

إيه الحل في الابن اللزقة 🤷‍♀️

التعلق غير الآمن بالأم بيختلف سببه ودرجته من طفل للتاني، وبالتالي بتختلف طرق الدعم والتعامل من حالة للتانية.

لكن لو ابنك أو بنتك مش بيقدروا يبعدوا عنك حتى للحظات، فدي بعض النصايح العامة اللي ممكن تساعد:

لعبة الاستغماية
ابدئي بثواني بسيطة جدًا. اختفي في مكان أنت عارفة انه هيلاقيك فيه بسهولة
أول مرة عدي لعشرة بعدها يبدأ يدور بعدين زودي العدد كل مرة عشان تطولي مدة غيابك و مدة بعد ابنك عمك
كرري اللعبة كتير عشان الطفل يتعلم إن الاختفاء مش معناه إنه مش هيلاقيك و يتعود

لعبة "ثواني و مفاجأة"

قولي له: "أنا رايحة المطبخ مثلًا وهارجع."
وروحي فعلًا وارجعي بعد لحظات. ممكن ترجعي بابتسامة أو حضن أو نشاط صغير بيحبه , أنا كنت عاملة لأولادي كل واحد أغنية و هم راجعين 😍
و لما برجع بعمل صوت القطة من ورا الباب 😁 كانوا ينطوا يقولوا مامي جت 😍
ده ليه ؟ بنربط الغياب المؤقت بالرجوع المؤكد مع شعور حلو مع الوقت زودي مدة غيابك ثواني كل مرة.

روتين وداع ثابت
كل مرة نفس الجملة ونفس الحضن.
High five
Or
See you later alligator
In a while crocodile 😁
أو أي حاجة تحبيها
عشان الكلمة نفسها ترتبط عند الطفل بالأمان والاطمئنان.

صندوق الأمان
حطي صورتك في اللانش بوكس أو الشنطة.
ولو هيلعب بعيد عنك شوية في النادي أو عند حد من العيلة، ممكن تديه منديل عليه برفانك المعتاد.
الحاجات البسيطة دي بتساعد الطفل يحس بالقرب والأمان.

حكايات قبل النوم
احكي قصص بسيطة عن طفل كانت ماما بتبعد عنه وترجع.
وخلي النهاية دايمًا مطمئنة: ماما بترجع.

وأهم من كل النصايح دي:
ما تسيبيش الطفل بطريقة مفاجئة أو بالخداع ( هات الشوز بتاعك و تعالى هاخدك معايا و يرجع ما يلاقيكيش 🤦‍♀️)
الثقة بتتبني من الصدق والتكرار أكتر من أي لعبة أو نشاط.

لو عندك أسئلة أو حابة أساعدك في خطة مناسبة لابنك أو بنتك حسب عمره وظروفه، ابعتيلي رسالة. 💛

صباح الخير ❤️