Kinaavunga? - ASunaaffa.gl

UUMMATIVIT QANOQ AKISSAGALUARPAATIT, IMMINUT EQQARSAATERSUUTIGISUUGUIT?

Inuit allat (suleqatit, ilaquttat, kammalaatit, meeqqatit, aappat il. il.) puigorallalaarlugit, illerpiaq imminut eqqarsaatigilaartuuguit - suukki sivikitsuaqqamilluunniit.

Uku apeqqutit qanoq akissagaluarpigit?
1) Massakkorpiaq suut naleqartippakka?
"Okay, taava massakkut uku pingaartissimavakka."
2) Suut atorfissaqartippakka?
"Atorfissaqartitakka iliuuseqarfigigukkit iluaallassinnaavunga."
3) Sunik kissaateqarpunga?
"Sukkoqquukkusunnerlunga ersarinnerulerpoq."
4) Massakkut qanoq misigisimavunga?
"Oqaasertalersinnaanngorpara sunerlunga."

APEQQUTINI AKISANNI UUMMATIVIT KINAANERIT QANOQ OQALUTTUARAA? SUKKOQQUUNNISSAT ERSARISSITIPPAA?

ULLUINNARNI SUNIK ILEQQOQARNERLUTIT MALUGINIARTARPIUK?

Qaratsatta iluani qamani, qamanerujussuaq ipput: ILEQQUGUT!

Ileqqut ullut tamaaviisa automatiskertitsisoraagut. Eqqarsaatiginngiivillugu iliuinnartarpugut, soorlu uku nerisartagaralutigit, Brugsenilialeraangatta tassuunaqquulluta imal. makikkaangatta imaaliorluta.

Tassa imaappoq pissusigut pissuseraagut, ileqqutsinniit aallaaveqartut.

Qarasaq nalinginnaasumik toqqissisimatitsiniaasuummat, uagutsinni (soorlu ileqqutsinni) allanngortitaqarnialeraangatta qarasarput qisuariartarpoq. Qarasaq toqqissisimanermik ”nappaateqarami” inuk ALLANNGORTINNAVEERSAARTARPAA, sorpassuarnillu misilitassaraluinik killilersortarlugu.

Assersuutigalugu ileqqut maliinnarlugu automatiskerlutit kaanngiivillutit tamussertaruit, ullullu arlaanni taanna allanngortinnialerukku – qaratsat ingerlaannaavik AKERLIUSSUTSIMIK takutitsissaaq! Illigisarparpassuaqartilissavaatit, allaat immaqa iluaalliortillutit ussernartorsiortillutillu.

Qaratsap ileqquni tigummiinnarusullugu sukataarsinnaasarpoq. Soorlu pujortartaruit, ataasiinnarmilluunniit ikilisinniarukkit, maluginiarukku taannaannarluunniit eqqarsaatigiinnarlugu ajorsassangaleriissaaq.

Ullaakkut tiitorfimmik ataasiinnarmik kaffisortakkat ikilisinniarukku, takussavat nangiarsaarileriissaaq.
Suliffissinni allatut suleriaaseqalertussanngorussi, toqqissisimajunnaartissinnaavaatit.

Taamaammat toqqissisimaneq peqqinnartuujuaannanngilaq, illillu kinaanerit paaserusukkukku, ulluinnanni imminut maluginialersinnaavutit sunik iluaqutigisannik iluaqutiginngisannillu ileqqoqartarnerlutit.

Ileqqunnik allanngortitsinialeruit qaratsanniit SILATUNERUSARIAQARPUTIT, soorlu oqarfigalugu ”Maani nerisassarpassuaqarpunga, ulikkaarpoq. Piumasuuguma nerisariaannaavunga, kisianni massakkuunngitsoq, kaannginnama”.
Cigaretsiuppat, kaffiuppat sunaluunniit iluaqutiginngisat peertuaannarsinnaavat.

Qarasaq killilersorneqarnialeraangami akerliussutsimik takutitsisarpoq, killilersornaguli nassuiaallugu naalakkeraanni pinartitsiunnaarluni suleqatiginnilertarpoq, ikiutaalerlunilu.
Illit suliassaraat maluginiassallugu qanoq kukkulluni ukapaatitsilluni ikiutaariaraluartarnersoq takussallugu.

QAAMMAT ATAASEQ IMMINUT ISIGINNAAQQAARINA - INGERLAANNAQ ILEQQUT ALLANNGORTINNAGU.
ILLIT KINAAVIT? SUNIK ULLUINNARNI ILEQQOQARPIT? SUUT ILEQQORIUNNAARUSUPPIGIT?